FIFA YAIPA SIMBA SIKU 30 IMLIPE MOSOTI MALIONI

Mosoti wakati alipokuwa Simba 

Na Berther Lumala

SHIRIKISHO la Soka la Kimataifa (FIFA) limeipa klabu ya Simba siku 30 kuanzia jana kuhakikisha inamlipa beki wa kati Donald Mosoti dola za Marekani 13,800 kutokana na kusitisha mkataba wa Mkenya huyo.

Maamuzi hayo yalitolewa na FIFA jana Alhamisi kupitia jopo la majaji wa Kitendo chake cha Usuluhishi na Uamuzi, Simba ikitakiwa kulipa kiasi hicho cha fedha kwa beki huyo baada ya kukiuka masharti ya kimkataba.

Katika barua ya FIFA ambayo mtandao huu uliiona jana ikiwa na anuani ya FAX +4143/222 77 55, iliyotumwa kwenda kwa mchezaji na upande wa Tanzania (Shirikisho la Soka nchini – TFF),imeamuliwa kuwa, Simba inapaswa kumlipa mlalamikaji, Donald Mosoti Omanwa, ndani ya siku 30 kuanzia tarahe ya kupokea maamuzi hayo (jana) kama ilivyoamuliwa  na jopo la majaji watatu; Thomas Grimm (Uswisi), Eirik Monsen (Norway) na Zola Majavu (Afrika Kusini).

Kutotekeleza maamuzi hayo kutaifanya klabu husika (Simba) kufikishwa mbele ya Kamati ya Nidhamu ya FIFA kwa kuzingatia uamuzi na utaratibu wa kawaida wa shirikisho (FIFA).

USD 13 800

Katika barua hiyo, Simba inatakiwa kumlipa Mosoti ndani ya siku 30 kuanzia jana, dola 13,800 na penalti ya asilimia tano (5%) ambayo ni dola za Marekani 600 kutokana na kumharibia mipango yake kisoka kuanzia Decemba 12, 2013 hadi siku ambayo malipo yatafanyika.

Sehemu ya maamuzi hayo yaliyosainiwa na Katibu Mkuu wa FIFA, Jerome Valcke, yanasomeka: Wahusika wanapaswa kumlipa mlalamikaji ndani ya siku 30 kuanzia tarehe ya kupokea maamuzi haya, fidia ya kuvunja USD 13 800 pamoja na 5% ikiwa ni penalti kuanzia16 Septemba 2014 hadi tarehe ambayo malipo hayo yatafanyika.”

KUVUNJA MKATABA

Simba ilimtema nyota huyo wa zamani wa Simba wa Nairobi City na Gor Mahia, zote za Ligi Kuu ya Kenya (KPL) Agosti 2014 akiwa amebakisha mwaka mmoja na miezi mitatu katika mkataba wake bila kumpa taarifa zozote juu ya kumwacha huku jitihada zake za kulimaliza suala lake kwa amani zikishindwa kuzaa matunda.

Mchezaji huyo kupitia wakili wake, Mwanasheria Felix Majani aliamua kulifikisha FIFA suala hilo baada ya kuzungushwa na uongozi wa Simba jijini Dar es Salaam kwa muda mrefu.

Alikaribisha kujiunga na Tusker FC kulinda kipaji chake wakati kesi hiyo ikishughulikiwa lakini ilikuwa ngumu kupata Hati ya Uhamisho wa Kimataifa (ITC) hadi pale FIFA ilipoingilia na kuruhusiwa kuitumikia klabu hiyo ya KPL msimu huu.

Mosoti alijiunga na Simba Desemba 2013 akitokea Gor Mahia kwa ushawishi waaliyekuwa  kocha mkuu wa Simba, Mcroatia Zdravko Logarusic aliyefukuzwa pia.

Hii si mara ya kwanza klabu za Tanzania kuagizwa zilipe mamilioni ya shilingi na FIFA kwani Yanga pia ilishawahi kuagizwa na shirikisho hilo lenye mamalaka ya juu kisoka ulimwenguni kumlipa beki wa kushoto Mkenya John Njoroge Sh. million moja za Kenya baada ya klabu hiyo ya Jangwani kuvunja makataba wake kienyeji.