MMILIKI WA AFRICA LYON APIGWA FAINI NA KUFUNGIWA MIEZI 6

Rahim Kangezi

BODI ya ligi kuu Tanzania bara amemtoza faini ya laki mbili (200,000/=) na kumfungia miezi sita kutojihusisha na soka mmiliki wa Africa Lyon ya Dar es salaam inayoshiriki ligi daraja la kwanza Tanzania bara, Rahim Kangezi Zamunda.

Kwa mujibu wa barua yenye KUMB.TPLB/FDL/KF/499 iliyotumwa na Bodi kwenda kwa Kangezi leo hii januari 16 na mtandao huu kupata nakala yake imeelezwa kuwa kikao cha bodi ya ligi na TFF kimekutana na kupitia taarifa za makamisaa na waamuzi wa michezo iliyopita.

Barua hiyo iliyoandikwa na kaimu mkurugenzi wa Bodi ya ligi, Fatma Abdallah imefafanua kuwa katika mchezo namba 70 (Africa Lyon v African Sports) uliofanyika uwanja wa Karume, Kangezi ‘alimkwida’ mwamuzi na kumtolea lugha chafu, hivyo alivunja kanuni ya 40 (Udhibiti wa viongozi) ambayo atatumikia adhabu ya kufungiwa kujishughulisha na michezo kwa kipindi cha miezi sita (6) na kulipa faini ya Tsh 200,000.

Fatma katika barua yake ameeleza kuwa faini hii lazima ilipwe kwa Bodi ya ligi kabla ya adhabu ya kufungiwa miezi sita kuisha, vinginevyo Kangezi hataruhusiswa kujihusisha na michezo mpaka atakapolipa faini hiyo.

Aidha barua imefafanua kuwa adhabu hiyo inaanzia tarehe ya barua hiyo ambayo ni leo januari 16, 2015.

Pia kupitia barua hiyo, Kangezi ameonywa kutokurudia kosa hilo, vinginevyo hatua kali zitachukuliwa dhidi yake.

Nakala ya barua hiyo imetumwa kwa Mwenyekiti wa Bodi ya ligi kuu na Mkurugenzi wa Mashindano TFF.