UJIO WA MAGWIJI WA REAL MADRID NI BONGE LA FURSA KUJIOSHA KITAIFA, KIMATAIFA, ITAKUWA ‘DHAMBI’ KUWAPOTEZEA TU!

Imechapishwa Julai 24, 2014, saa 1:18 asubuhi

MOJA ya stori kubwa kwasasa nchini Tanzania ni ujio wa kikosi cha magwiji wa Real Madrid maarufu kama `Real Madrid Legends`.

Wanandinga hao wa zamani waliotamba na Real Madrid kwenye michuano ya La Liga , UEFA pamoja na kombe la dunia wakiwa na nchi zao watafanya  ziara ya siku nne nchini kuanzia Agosti 22 mwaka huu na kitacheza mechi moja ya kirafiki dhidi ya kikosi maalumu cha nyota wa Tanzania.

Meneja wa ziara hiyo, Dennis Ssebo alibainisha kuwa Vodacom Tanzania ni miongoni mwa wadhanimi wa ziara hiyo. Wadhamini wengine ni Fastjet, Tropical, Pembe Flower, Lake Gas, EFM Radio na Ladger Plaza Bahari Beach.

Ziara hii ni mwaliko wa kampuni ya Tanzania Sisi ni Nyumbani (TSN), chini ya mkurugenzi wake mkuu, Farough Baghozah na meneja wa ziara hiyo ni Dennis Ssebo.

Moja ya mjadala unaoendelea kwa sasa ni pamoja na kujua faida ya ujio wa wachezaji hawa wa zamani, waliotamba na kutikisa ulimwengu wa soka kwa ngazi ya klabu na kimataifa.

Kiuhalisia kabisa, Kuja kwao nchini kuna faida au fursa nyingi nje ya ujio huo. Serikali kupitia Wizara ya Maliasili na Utalii na bodi ya utalii wanatakiwa kuichangamkia hii tenda na kuwa sehemu ya udhamini sanjari na makampuni yanayowezesha ziara hiyo ya akina Luis Figo, Zinedine Zidane, Fabio Cannavaro, Ronaldo De Lima na wengineo.

Kiukweli hili ni bonge moja la fursa kwa makampuni, serikali kupitia bodi ya utalii kuwa sehemu ya udhamini ili kujitangaza kitaifa na kimataifa.

Kwa bahati mbaya sana, Tanzania hatujui mahala pa kuweka hela, watu wengi ambao wapo kwenye maeneo mengi, si sahihi kwa maana kwamba wamekosa ueledi wa kung`amua fursa kwa haraka na kuwekeza ili ‘kupiga mtonyo’ wa ukweli.

 Utashangaa kuona ujio wa timu kama ile unachukuliwa poa tu, wanapotezewa watu kama Figo, mwanasoka bora wa Ulaya, watu kama Zidane aliyetwaa kombe la dunia na UEFA, mwanasoka bora wa ulaya na duniani kote.

kumbe ingekuwa nchi nyingine, hii ni fursa ya kujitangazwa kwasababu atakachokifanya Figo, Zidane au Cannavaro, vyombo vya habari ulimwenguni kote vinafuatilia hiyo stori.

Kwahiyo wakienda kama Mlima Kilimanjaro na sehemu nyingine ya vivutio vya utalii, ni fursa moja rahisi sana kuitangaza nchi kupitia kwa wale jamaa.

Serikali kupitia Wizara ya Maliasili na Utalii inatakiwa kutumia fursa hii kujitangaza kimataifa na kitaifa. Ndio maana unaona nchi nyingine zinawatumia wachezaji hao kama mabalozi.

Kwanini wanawatumia kama mabalozi? kwasababu watu wale ni maarufu tayari na wana watu wengi nyuma yao (mashabiki).

Zinedine Zidane atakuwepo nchini mwezi ujao

Kama kuna fursa ya wao kuja, watumike zaidi ya kuenda uwanja wa taifa kucheza mpira na kuwashuhudia ‘Laivu’, halafu kupiga picha tu.

Ujio wao uwe na tija, makampuni mengi ya simu, benki na mengineyo, yanatakiwa kujihusisha na wale watu na  itakuwa rahisi kuwafikia wateja.

Kwa mfano Luis Figo akipiga picha mbele ya bango la Vodacom au Tigo kwa maana ya wao kuwa wadhamini na ‘akipostiwa’ kwenye mtandao wa kijamii wa Instagram au facebook, gazeti, TV au sehemu yoyote ile, watu wangapi wataiangalia.

Watu wangapi watapenda kuona mahojiano ya Figo, halafu huku nyuma kuna nembo ya kampuni yoyote ile? Ni wengi sana.

Kwahiyo kuna fursa ya serikali kupitia taasisi husika na makampuni kujitangaza kupitia ujio wa hawa wachezaji na kujinufaisha kuliko kuwachukuliwa poa tu.

Mkurugenzi wa bodi ya Utalii Tanzania Balozi Charles Sanga na meneja wa masoko wa bodi hiyo, Geofrey Meena wanatakiwa kuufikiria mara mbili ujio wa wachezaji hawa na kutumia fursa hiyo kujitangaza kimataifa.

Chanzo: Shaffihdauda.com