MNYAMA SIMBA AIVUTIA KASI ISMAILIA `SIMBA DAY`, JALAMBA LAPIGWA SEHEMU TATU TOFAUTI!

Na Baraka Mpenja, Dar es salaam

Imechapishwa Julai 24, 2014, saa 1:33asubuhi

WEKUNDU wa Msimbazi Simba wamedhamiria kurejesha heshima yao iliyopotea kwa miaka mitatu mfululizo katika michuano ya ligi kuu soka Tanzania bara.

Simba ambayo imemuongezea mkataba wa mwaka mmoja kocha wake mkuu, Mcroatia, Zdravko Logarusic ipo katika maandalizi ya msimu mpya na malengo yao kwasasa ni kuelekea katika mchezo maalumu wa kirafki utakaopigwa siku ya Agosti 9 mwaka huu dhidi ya Ismailia ya Misri kwenye tamasha la klabu hiyo la ‘Simba Day’ ndani ya uwanja wa Taifa jijini Dar es salaam.

Tamasha la ‘Simba Day’ ni maalumu kwa mashabiki, viongozi na wanachama wa klabu hiyo kukutana kwa lengo la kubadilishana mawazo. Pia linatumika kama sehemu ya kutambulisha wachezaji wapya waliosajiliwa kwa ajili ya msimu mpya.

Kiungo wa zamani wa Simba na kocha msaidizi wa klabu hiyo, Suleiman Abdallah Matola `Veron` amesema kuwa wanaendelea na mazoezi vizuri ambapo wanafanya maeneo matatu tofauti.

“Tumekuwa tukifanya programu ya maandalizi vizuri. Tumekuwa tukienda Ufukweni, Gmy na jioni tunafanya mazoezi uwanja wa chuo kikuu cha Dar es salaam. Kwasasa maandalizi  yanalenga mechi ya Agosti 9 siku ya Simnba Day”. Alisema Matola.

Ismailia watakabiliana na Simba sc siku ya Simba day Agosti 9 mwaka huu uwanja wa Taifa jijini Dar es salaam

Kuhusu wachezaji waliokuja kufanya majaribio klabuni hapo, Matola alisema wote wamepigwa chini na kocha Loga kutokana na kuwa na kiwango cha kawaida kulinganisha na mahitaji wake.

“Wachezaji waliokuja kufanya majaribio kutoka nchi za Rwanda, Afrika kusini na Congo, kiukweli mwalimu hajavutiwa na yeyote kutokana na uwezo mdogo walioonesha, hivyo ameamua kuelekeza nguvu kwa wachezaji aliopendekeza wasajiliwe. Tunaamini kufikia wiki ijayo watapatikana,”. Alisema Matola.

“Mwalimu anataka washambuliaji na viungo, lakini wengine wameshasaini na wengine wanatafutwa”.

“Tumekuwa tukifanya mazoezi na wachezaji wachache, lakini wiki ijayo tutakuwa tumekamilika zaidi”.

Aidha Matola aliwaomba wanachama wa Simba  kuwa na umoja na mshikamo wakati huu ambao timu yao inajengwa.

Alisema umoja utaifanya klabu itimize malengo yake msimu ujao na kurejesha heshima iliyopotea kwa muda mrefu.