'MESSI ALISTAHILI TUZO YA MCHEZAJI BORA KOMBE LA DUNIA 2014'

Imechapishwa Julai 22, 2014, saa 4:00 asubuhi

WAKATI mabishano ya kama kweli Lionel Messi alistahili tuzo ya mchezaji bora wa kombe la dunia 2014 nchini Brazil yakipoa `mdogo mdogo`, mchezaji mwenzake wa Barcelona, Sergi Roberto ameibuka tena akisema jamaa yake alistahili kutwaa tuzo hiyo.

Nyota huyo wa Argentina aliyaanza kwa kasi mashindano yaliyomalizika Brazil, lakini alizimika kadiri mashindano yalivyoendelea na alikuwa mchezaji tegemeo katika kipigo cha bao 1-0 dhidi ya Ujerumani, mechi ya fainali uwanja wa Maracana.

Licha ya nyota huyo mwenye miaka 27 kutajwa kuwa mchezaji bora wa kombe la dunia-maamuzi ya kumpa tuzo hiyo yalipokolewa kwa hisia tofauti na wachezaji, makocha na mashabiki wa soka duniani kote.

Ingawa kwa upande wa Roberto bado ana msimamo kuwa Messi alistahili tuzo hiyo na ametaka aheshimiwe kwa kiwango chake.

“Nilimuona Messi kombe la dunia kama ilivyokuwa miaka mitatu iliyopita,lakini mwaka huu alikuwa kwenye ubora wake.” Aliwaambia waandishi wa habari.

“Anastahili zawadi na kumkosoa sio haki, alitaka kushinda kombe la dunia, anastahili heshima kubwa. Ameisaidia sana klabu yake na Argentina”.

Roberto mwenye miaka 22, pia aliwasifu Real Madrid kwa usajili wa karibuni wa Toni Kroos kwa kuzingatia ubora wake wa siku za karibuni katika kikosi cha Bayern na timu ya Taifa ya Ujerumani.

“Ni mchezaji mzuri sana, amethibitisha hilo kombe la dunia na klabu ya Bayern. Hajajiunga na sisi, lakini mchezaji yeyote bora anakaribishwa Barcelona”.