UCHAGUZI SIMBA SC: MICHAEL WAMBURA ATUMIA `BUSARA` KUJIBU MAPIGO YA NDUMBARO

 

Na Baraka Mpenja, Dar es salaam

Imechapishwa Juni 2, saa 10:18 jioni

MGOMBEA aliyeenguliwa kugombea nafasi ya Urais katika uchaguzi wa klabu ya Simba sc unaotarajia kufanyika juni 29 mwaka huu,  Michael Richard Wambura, leo hii amekutana na waandishi wa habari kujibu hoja za mwenyekiti wa kamati ya uchaguzi wa klabu hiyo, Mwanasheria Damas Ndumbaro juu ya kuenguliwa kwake.

Katika mkutano wake na waandishi wa habari jijini Dar es salaam, Wambura amesema kwamba katika mkutano wa jana baina ya Ndumbaro na vyombo vya habari alieleza mambo mbalimbali kuhusu uchaguzi wa Simba, lakini alitumia muda mwingi kutoa hoja, shutuma na matusi mbalimbali juu yake.

Wambura amesema ni wazi maelezo yake yalilenga kuonesha maamuzi ya kamati yake kuondosha jina lake kwenye mchakato wa uchaguzi wa Simba sc.

Hata hivyo, Wambura alisema kwa kuzingatia katiba, kanuni za TFF na Simba ameamua yafuatayo:

1.   “Kwakuwa nimeshakata rufaa TFF kupinga maamuzi ya kamati ya uchaguzi ya Simba, busara inanielekeza kutokulumbana na kujibizana na bwana Ndumbaro ili kuipisha kamati ya rufaa ya uchaguzi ya TFF ifanye maamuzi yake.”

2.   “Kwa mambo ambayo hayana uhusiano na uchaguzi kama kughushi nyaraka, matusi na kashfa mbalimbali mambo hayo nitayawasilisha kwa kamati ya maadili ya TFF ili ukweli ufahamika na hatua zichukuliwe na baada ya hapo vyombo vya dola vinavyohusiana na kutambua maandishi vitapewa nafasi ya kufanya kazi yake.”

3.   “Ninawaomba wanachama na wapenzi wa Simba katika kipindi hiki kuwa watulivu tukisubiri maamuzi ya kamati ya TFF na vyombo vinavyohusika kutoa maamuzi, ni imani yangu kuwa ukweli utakuwa wazi na haki itapatikana.”

Haya ndio majibu ya Michael Richard Wambura kwa mwenyekiti wa kamati ya uchaguzi ya Simba, Dkt. Ndumbaro.