SIMBA SC FANYENI UCHAGUZI JUNI 29, HANS POPPE AFANYE VITU VYAKE

Mwenyekiti wa kamati ya usajili ya Simba sc, keptein wa zamani wa JWTZ, Zacharia Hans Poppe anasubiri viongozi wapya ili awasainishe mikataba wachezaji wapya.

Na Baraka Mpenja, Dar es salaam

0712461976

Imechapishwa Juni 19, 2014 saa 4:08 asubuhi

KWASASA hakuna jambo la msingi kwa klabu ya Simba zaidi ya kufanya uchaguzi wa kumpata rais mpya, makamu wa rais na wajumbe wa kamati ya utendaji ili masuala mengine yaendelee.

Kumekuwepo na mvutano mkubwa baina ya wanachama juu ya mizengwe inayogubika uchaguzi wa klabu hiyo, lakini chanzo cha matatizo hayo ni pale jina la Mgombea Urais Michael Wambura lilipoenguliwa na kamati ya uchaguzi chini ya mwenyekiti wake Wakili Dkt. Damas Daniel Ndumbaro.

Mwisho wa siku, lazima ifahamike kuwa kila palipo na wengi pana mengi na wanapokutana watu zaidi ya wawili, lazima kutofautiana kwa mawazo kutokee. Mivutano kama hii ni jambo la kawaida katika chaguzi za kidemokrasia kwasababu kila mtu ana haki ya kumtetea anayemtaka.

Ukiona watu zaidi ya 100 mnakubaliana kirahisi,kunaweza kuwa na mambo mawili, moja: kuna kiongozi wa mawazo anayetegemewa hivyo wote mnamfuata na pili kuna uoga kwa baadhi ya watu kusema ya moyoni.

Kuvutana ni jambo zuri kwasababu mnakosoana na kuwekana sawa ili kufikia lengo moja. Kukosoa mtazamo wa mtu ni jambo jema wala halina tatizo lolote. Cha msingi hoja ipingwe kwa hoja. Unayepinga hoja ya mwenzake, alete hoja mbadala na usilete vurugu na matusi.

Hoja haipingwi kwa rungu, inapingwa kwa hoja mbadala. Mkifanya hivyo, mbona mnafanikiwa tu.

Kwa hahati mbaya unaweza kumpenda mtu ambaye hana haki kikatiba na kila inapotokea ndivyo sivyo kwake ukaishia kuanzisha malumbano. Kila jambo linaendeshwa kwa misingi ya kanuni na sheria.

Kama mtu anavunja kanuni na sheria, lazima achukuliwe hatua. Kama unampenda mvunja kanuni na sheria lazima ifike wakati uwe mpole kwasababu makosa yanastahili hukumu.

 

Wachezaji wote waliohitaji na kocha Dravko Logurusic `Loga` wameshafanya mazungumzo na mwenyekiti wa kamati ya usajili, Hans Poppe. - See more at: http://shaffihdauda.com/?p=2327#sthash.nkxJzXZS.dpuf

Wachezaji wote wanaohitajika na kocha Dravko Logarusic `Loga` wameshafikia makubaliana na Hans Poppe.

Lakini kama umegundua mtu wako hajatendewa haki wakati ana haki kikatiba, basi kumpigania sio dhambi.

Suala la Wambura limekuwa tatizo katika uchaguzi wa Simba, lakini ikumbukwe kuwa uchaguzi bora ukafanyika juni 29 kwa mazingira yoyote yale yatayokuwepo.

Kama Wambura ana haki atagombea, kama hana haki ataondolewa katika uchaguzi huo kwasababu kamati ya rufani inakaa leo.

Kinachowasumbua watu wengi ni kuendeshwa na mapenzi kwa wagombea wanaowataka, hivyo kusahau kanuni na sheria za kikatiba.

Nilisema jana, Wambura alishafanya makosa siku za nyuma kwa kuipeleka Simba mahakamani. Suala hili si la kujadili tena, FIFA wameeleza wazi kuwa mtu anayepeleka masuala ya mpira wa miguu mahakama za kawaida anafungiwa moja kwa moja. Lipo wazi wala halihitaji kuvunga.

Lakini  tayari inaonekana uongozi wa Ismail Aden Rage ulishafanya makosa juu ya suala hili kwa kushindwa kutekeleza maamuzi ya kumsimamisha Wambura na kumuacha aendelee kuitumikia Simba kama mwanachama hai huku akilipa ada.

Yote kwa yote, Simba inahitaji kupata viongozi juni 29, binafsi naombea uchaguzi ufanyike siku hiyo ili kuinusuru klabu hiyo na matokeo mabovu waliyoambulia misimu miwili mfululizo.

Siku za karibuni, nilizungumza na mwenyekiti wa kamati ya usajili ya Simba, keptein wa zamani wa Jeshi la wananchi wa Tanzania, (JWTZ), Zacharia Hans Poppe kuhusu usajili wa klabu.

 

Poppe alisema wanahitaji kusajili kikosi cha ushindani ili kusaka ubingwa msimu ujao. Mwanajeshi huyo wa zamani alifafanua kuwa kamati yake imeshaanza mazungumzo na wachezaji wanaohitajika na kocha Dravko Logarusic.

Kwa kiasi kikubwa, Poppe alisema walishafikia makubaliano na wachezaji wengi wanaowahitaji, kilichobaki ni kuwasainisha mikataba, jambo ambalo ameshindwa kulifanya kwasababu anasubiri wapatikane viongozi wapya.

Kutofanyika uchaguzi maana yake unataka Simba isiwe bora msimu ujao kwasababu itashindwa kusajili. Poppe ana hoja ya msingi, leo hii huwezi kuwasainisha mikataba wachezaji bila kuwa na viongozi.

Unamnunulia mtu nguo usiyejua umbo lake na rangi aipendayo. Ikikataliwa si utakuwa umekula hasara?, bora kumsubiri rais mpya na viongozi  wapya wa chini yake. Kwahili sina tatizo na Poppe.

Poppe mwenye mapenzi  na Simba ana nia ya kuifanya Simba iwe bora msimu ujao, lakini inategemea na viongozi watakaopatikana juni 29. Simba kuwa na viongozi imara, hata timu itakuwa imara uwanjani. Viongozi wana uhusiano wa moja kwa moja na wachezaji wao.

Nitaendelea kuunga mkono juhudi zinazofanyika ili uchaguzi ufanyika juni 29, ni muhimu kuiona Simba mpya na watu wanaohusika kuwashauri watu wanaotaka uchaguzi usifanyike, waache mara moja kwasababu hizi ni hujuma za waziwazi,.

Sina maslahi na Simba, wala sina unazi na Simba, lakini nina maslahi ya maandeleo ya soka la Tanzania. Kufanya vibaya kwa Simba haiwezi kunifurahisha, lakini kufanya vizuri na kuonesha ushindani, ndio maendeleo ya soka la Tanzania.

Simba kutikisika, ladha ya mpira wa Tanzania inapungua. Ni timu kongwe yenye mvuto kwa mamilioni ya Watanzania.

Uchaguzi ufanyike juni 29, Zacharia Hans Poppe afanye kazi yake kwa umakini kama alivyopanga.

Kila la kheri wekundu wa Msimbazi Simba kuelekea uchaguzi wenu.