KATIBU KUU WA ZAMANI WA YANGA SC GEORGE MPONDELA KUZIKWA LEO MAKABURI YA KINONDONI

 

George Mpondela enzi za uhai wake

Na Baraka Mpenja, Dar es salaam

Imechapishwa Juni 19, 2014 saa 2:34 asubuhi

ALIYEWAHI kuwa Katibu Mkuu wa klabu ya Yanga , George Johnson Mpondela ‘Castro’ atazikwa leo katika makaburi ya Kinondoni jijini Dar es salaam.

Mtoto wa Marehemu, Dickson Mpondela amesema kuwa asubuhi hii kuanzia majira ya saa 2:00 mpaka 3:30 mwili wa marehemu utaagwa nyumbani kwao kigamboni na baadaye mwili utapelekwa kanisani Muhimbili kwa ajili ya ndugu, jamaa na marafiki wengine kupata fursa ya kumuaga mpendwa wao.

“Hapa nyumbani hatutachukua muda mrefu kuaga mwili wa marehemu kwasababu watakaohusika ni majirani tu, baadaye saa 4 tutaanza safari ya kuelekea pale Muhimbili. Kutakuwa na ibada na baadaye watu wataaga mpaka saa 8 mchana”. Alisema Dickson.

Dickson amesema saa 8 au saa tisa msafara mzima utaelekea katika makaburi ya kinondoni tayari kwa kumpumzisha mwanamichezo Mpondela.

Hata hivyo, mototo huyo wa marehemu amesema familia yao inapata faraja kutokana na baadhi ya wanamichezo na wanachama wa Yanga kujitokeza kutoa kutoa pole.

Dickson ameomba watu  wajitokezea kwa wingi kumuaga mpenda wao.

George Mpondela alifariki dunia Juni 15 mwaka huu katika Hospitali ya Taifa Muhimbili (MNH) jijini Dar es Salaam.

 Mpondela alichaguliwa kuwa Katibu Mkuu wa klabu ya Yanga katika uchaguzi uliofanyika mwaka 1994 baada ya kumshinda aliyekuwa mpinzani wake wa karibu George Ndaombwa.

Bwana alitoa na bwana ametwaa. Pumzika kwa amani Mpondela.