JICHO LANGU LA TATU; TAIFA STARS, BADO KIZINGITI KIMOJA TU KABLA YA KUFUZU KWA FAINALI ZA MOROCCO

 

Na Baraka Mbolembole

Imechapishwa Juni 2, 2014, saa  12:12 jioni

... Timu ya Taifa ya Tanzania,  Taifa Stars imefanikiwa kutinga hatua ya pili ya mechi za mtoano baada ya kuiondosha timu ya Zimbabwe,  The Warrios kwa jumla ya magoli 3-2.  Kwa matokeo hayo, Stars itapambana na timu ya Taifa ya Msumbiji, Black Mambas na mshindi wa michezo miwili baina yao atafuzu kwa hatua ya makundi kuwania kufuzu kwa fainali za AFCON 2015, nchini, Morocco.

ZIMBABWE v TANZANIA,

Katika mchezo wa jana,  Stars ilimkosa mshambuliaji wake namba moja, Mbwana Samatta anayesumbuliwa na majeruhi ya nyama za paja,  lakini bado kikosi cha kocha, Martin Nooij kilikaribia kuondoka na ushindi wa kwanza ugenini baada ya kupita kwa miaka mitano. Mara ya mwisho, Stars kushinda ugenini ni mwaka 2009,  wakati ilipoichapa,  Mauritania katika michezo ya makundi kuwania kufuzu kwa fainali za kombe la dunia, 2010.

Mbele ya watazamaji, 60, 000 katika uwanja wa National Sports Stadium,  Stars ilifuta goli la kuongoza la wenyeji walioanza kufunga katika dakika ya tatu tu ya mchezo, ila walijiweka sawa na kumiliki mchezo kuanzia dakika ya 10 hadi waliposawazisha katika dakika ya 21 kutokana na mpira wa kona uliopigwa na kiungo wa kulia,  Saimon Msuva.  Goli la nahodha,  Nadir Haroub lilikuja baada ya mlinzi huyo wa kati kupanda mbele huku akijiamini na kuruka juu kasha kupiga kichwa cha uhakika. Mara nyingi Stars imekuwa ikikosa ufundi katika kucheza mipira ya kona, ila goli hilo lilitokana na rekodi yake nzuri ya ufungaji wa mipira ya kona limefungua njia na kuonesha kuwa bila kujiimarisha katika uchezaji wa mipira iliyokufa timu inakuwa na nafasi finyu ya kupata ushindi katika michezo ya kimataifa.

SAFU YA ULINZI.

Wachezaji wote walipambana, safu ya ulinzi japo iliruhusu magoli mawili iliweza kuwa imara na kuwa dhibiti wenyeji wao ambao walifungwa goli la pili mara tu baada ya kuanza kwa kipindi cha pili. Zimbabwe walifanya mashambulizi mengi lakini safu ya ulinzi iliyokuwa na Shomari Kapombe, Oscar Joshua, Kelvin Yondanna Nadir ilifanya kazi kubwa.Goli la kusawazisha la wenyeji lilitokana na mpira wa kona iliyokwenda moja kwa moja nyavuni lakini hilo haliwezi kutoa sifa nzuri ya kipa, Deo Munish ambaye alikuwa mchezaji bora wa mechi kwa upande wa Tanzania.

Nooij ameshuhudia timu yake ikiruhusu goli kwa mara ya kwanza katika michezo minne aliyoiongoza na goli la kwanza la Zimbabwe limemkumbusha kitu, kuwa timu nyingi za Tanzania zinafungwa katika dakika za mwanzo, ila walishughulika na tatizo hilo katika ngwe ya pili na kupata matokeo yaliyoivusha timu.
 

SAFU YA KIUNGO.

 Stars ilianza na viungo wanne na hakuna aliyetaraji kama, Erasto Nyoni angekuwepo uwanjani, Nooij aliwapanga, Mwinyi Kazimoto, Msuva, Amri Kiemba na Nyoni na timu ilionekana kumiliki mpira uwanjani japo bado wachezaji wa idara hiyo walionekana kuchoka mapema na wakati mwingine kupiga pasi zisizofika kwa walengwa, Stars ilionekana kunufaika na wachezaji hao wazoefu ambao waliweza kutulia uwanjani na kuisaidia timu. Ukimtoa, Msuva safu hiyo ya kiungo ilikuwa na wachezaji wazoefu ambao wamekuwa kikosini kwa miaka sita na kuendelea hivyo kocha, Nooij ametumia uzoefu wao na kuisaidia timu kusonga mbele.

Nyoni, alitimiza majukumu yake vizuri japo alionekana kushambulia wakati fulani, jukumu lake kubwa ilikuwa ni kukaba na kusaidia eneo la kati na ulinzi wa kushoto, katika siku ambazo mchezaji huyo alionekana kuwa bora, basi jana alikuwa bora kwakuwa alifanya kazi aliyoagizwa na Walimu wake. Ugumu wa Stars ulikuwa katikati ya uwanja na hapo kulikuwa na viungo watatu wakabaji

Zimbabwe wanashambulia zaidi kupitia upande wao wa kushoto na katika mchezo wa kwanza wiki mbili zilizopita, Kapombe alionekana kupata tabu, ila uwepo wa Msuva uliwasukuma nyuma wenyeji badala ya kusonga mbele. Stars ilimkosa, Samatta ambaye huwakimbiza wapinzani wake uwanjani, ila walikuwa na mchezaji hatari uwanjani katika mchezo wa jana. Msuva alitumia vizuri kasi, aliwasumbua walinzi wa Zimbabwe na kuwafanya washindwe kusogea mbele.

Hakika sasa timu ya Tanzania inaonekana kwenda vizuri kiuchezaji, nidhamu na taratibu timu inaanza kujiamini hata ikiwa inacheza ugenini. Msuva alijiamini na hilo ndilo jambo linalopaswa kufanyika kwa timu nzima uwanjani. Kazimoto, pengine unaweza kuona hakuwa katika ubora wake wa juu ila mipira yake mirefu ilifanya timu kushambulia kwa kushtukiza ila anapaswa kuwa makini zaidi uwanjani na kupunguza kupoteza mipira mara kwa mara. Kiemba alicheza katika kiwango kizuri, huku akicheza kama mchezaji wa kimataifa. Nooij alimpumzisha katika dakika 62 baada ya kiungo huyo kuanza kucheza rafu.Ilikuwa ni dalili ya kuchoka, alioneshwa kadi ya njano. Kuingia uwanjani kwa Frank Domayo mahala kwa Kiemba kulileta nguvu mpya na timu nzima ilicheza kwa nguvu kulinda ushindi wa Dar es Salaam.

SAFU YA MASHAMBULIZI.

 John Bocco alifunga goli pekee katika mchezo wa kwanza wiki mbili zilizopita, safari hii hakupewa hata nafasi ya kupandisha soksi zake. Walinzi wawili wa Zimbabwe walikuwa wakimtazama yeye zaidi na hilo lilifanya mechi kuwa ngumu kwa upande wake ila bado, Stars ilikuwa na ' bunduki' nyingine uwanjani. Thomas Ulimwengu amekuwa mshambuliaji muhimu sana kwa Stars katika muda wa mwaka mmoja sasa, alifunga goli mara tu baada ya kuanza kwa kipindi cha pili akitumia makosa ya walinzi wa Zimbabwe ambao hawakuwa makini.

Kufunga magoli mawili ugenini ni kitu ambacho hakijatokea kwa muda sasa katika kikosi cha Stars lakini sasa timu inaweza kupanga vizuri mashambulizi na kufunga magoli. Bila, Samatta timu imekuwa imara, niliwahi kuandika kuwa wachezaji wazoefu wakitumia uzoefu wao watamsaidia Nooij, na ndicho walichofanya. Msumbiji imekuwa tatizo kubwa kwetu ila hawatuzidi kitu. Walitufunga kutokana na mbinu zetu ndogo za michezo ya kuamua timu ya kufuzu mwaka 2007 wakati, Stars ilipokuwa ikihitaji ushindi tu ili kufuzu kwa AFCON, 2008, katika uwanja waTaifa ila sitegemei makosa yale ya kina Amir Maftaha yatatumaliza tena wakati huu beki tatu ikishikiliwa na Oscar Joshua.

Msumbiji walikuja Tanzania na kulazimisha sare ya goli 1-1 na Stars ilikwenda ugenini na kupata sare kama hiyo na hivyo kufanya mechi kuamuliwa kwa sheria ya mikwaju ya penalty. Siamini kama, Samatta anaweza kukosa tena mkwaju wake kama ilivyokuwa mwaka 2012 wakati walipotutoa kwa mikwaju ya penalty katika harakati za kufuzu kwa AFCON 2013. Hawa jamaa tukiwaondoa, ‘ Jicho langu la tatu’ limeona kabisa kuwa kikosi cha Nooij kinaweza kutinga Morocco mwakani mbele ya Zambia, Niger na Cape Verde. Zambia, tunafungana nao, Cape Verde ni vibonde wetu, labda hao Niger . Stars imekomaa sasa, inaweza kwenda AFCON  mwakani, shukrani kwa walioambatana na timu Zimbabwe, sapoti yao ilionekana . Makosa yapo, ILA Mwalimu atayafanyia kazi, naamini katika fikra na mtazamo wa Nooij, Msumbiji ndio wanafuata sasa.

0714 08 43 08