Abdi enzi hizo akisaini kuitumikia klabu ya Coastal Union ya Tanga
Na Baraka Mbolembole
Kiungo-mlinzi wa timu ya Taifa ya Vijana, U20, na
timu ya Taifa ya Tanzania, Abdi Banda ameweka wazi kuwa yupo katika mazungumzo
na klabu ya soka ya Simba SC, na endapo watafikia maafikiano atajiunga na
mabingwa hao wa zamani wa Tanzania Bara. Banda, ameichezea timu ya Coastal
Union kwa misimu miwili, huku msimu wake wa kwanza akicheza kama mchezaji wa
timu ya pili. Alianza kucheza ligi kuu katika mzunguko wa pili wa msimu wa
2012/13, mara baada ya Coastal kumsaini akitokea timu nyingine ya Tanga, na
mahasimu wa Coastal, timu ya Africans Sports. Mtandao huu utakuwa ukiwaletea
mahojiano ya moja kwa moja na wachezaji wa Kitanzania kila siku za wiki, na leo
tumeanza na kiungo huyu namba sita, ambaye pia ana uwezo wa kucheza kwa ufasaha
nafasi ya ' beki tatu'. Je, Abdi atajiunga na Simba? Maswali na majibu mengi
utayapata hapa..
SWALI; Abdi, msimu uliopita ulikuwa na changamoto
nyingi, kitu gani umejifunza kama mchezaji?
BANDA; Nimejifunza jinsi ya kulinda kiwango changu
kwa kucheza katika timu. Nimegundua kuwa, timu ikifanya maandalizi inafanya
vizuri na inakuwa na haki ya kufanya vizuri, kuliko timu inayobahatisha. SWALI;
Unamaanisha kuwa, Coastal Union iliangushwa na maandalizi yao? BANDA; Kabla ya
kuanza kwa msimu timu ilijiandaa, na ilikuwa na malengo mazuri tu, lakini mara
baada ya msimu kuanza timu ilishindwa kulinda nia ya kuchukua ubingwa, ilifikia
hatua timu ikapotea kabisa. Tuliangusha lengo kuu.Tulitakiwa kujipanga mwanzo
hadi hatua ya mwisho.
SWALI; Kucheza kwako kwa miaka miwili katika timu
ya Coastal Union umejifunza kitu gani?
BANDA; Nimejifunza kuwa mpira wa Tanzania
unahitaji vitu vingi, Kwanza, ni mchezaji mwenyewe kuwa na malengo kabla ya
ligi kuanza, unajiuliza ' nilifanya nini msimu uliopita, na wapi nimekosea'.
Nimejifunza kwamba nilipaswa kujipanga na kweli nimejipanga. Uwezo wangu
umeonekana, na bado sijafikia mwisho wa uwezo.
SWALI; Ni kweli, Coastal ilikuwa ikifanya
maandalizi makubwa katika michezo dhidi ya Yanga na Simba tu?
BANDA; Tulianguka kwa mengi, mwanzo tulikuwa na
maandalizi mazuri lakini taratibu hali hiyo ikatoweka. Tulikuwa tukifanya
maandalizi makubwa katika michezo dhidi ya Simba na Yanga. Viongozi wanakuwa ‘
bize’ kwa wiki mbili hadi tatu kabla ya mechi hizo, wakati mechi dhidi ya
Mgambo wanafanya maandalizi ya siku mbili. ILikuwa ni tatizo, timu ilikpoteza
umakini kila mahali. Tulikosa maandalizi ya ligi na kuwa na maandalizi ya mechi
Fulani tu.
SWALI; Umekuwa ukifunga magoli ya mbali nini siri
ya uwezo wako huo?
BANDA; Mchezaji lazima uwe na vitu, sifa na uwezo
wa kufanya vitu binafsi uwanjani kwa maslai ya timu. Mimi ninaamini nacheza
mpira, na wachezaji wapo wengi, ila najivunia kuwa na nguvu. Nina nguvu katika
miguu yangu na hiyo imekuwa faida kubwa kwangu na maumivu kwa wapinzani wangu.
Nafanya sana mazoezi ya miguu, huku nikijiamini nina uwezo wa kupiga mashuti ya
mbali. . Kikubwa ni kufanya mazoezi ya mara kwa mara.
SWALI;
Unacheza vizuri katika nafasi ya kiungo na ile ya ulinzi wa kushoto. Sina shaka
kuhusu uwezo wako katika matumizi ya mguu wa kushoto, je, unafanya jitihada
gani kuboresha mguu wako wa kulia?
BANDA; Hakuna, mchezaji aliyekamilika. Najitahidi
sana kubaki katika nafasi yangu, mguu wangu wa kulia hauna nguvu sana kama ule
wa kushoto. Hakuna tatizo, kwa kuwa nacheza katika nafasi yangu.
SWALI; Nini, silaha yako kubwa unapokuwa uwanjani?
BANDA; Kumiliki mpira, kupiga pasi za mwisho, na
kupiga pasi ndefu.
SWALI; Umecheza, Coastal kwa misimu miwili, vipi,
utaendelea kucheza hapo au kuna mahali unafikiria kwenda ili kujiendeleza zaidi
kiuchezaji?
BANDA; Kama uwezo wangu umekubalika, nipo tayari
kuondoka Coastal.Haiwezekani kila siku mchezaji unabaki timu moja.
SWALI; Kuna uvumi kuwa unakwenda kujiunga na Simba
SC, ni kweli, na kipi kinaendelea sasa?
BANDA; Mazungumzo yapo. Mimi kama mchezaji na kwa
kipindi kama hiki maneno hayo lazima
yawepo. Kama uwezo wangu umeonekana nipo tayari kusonga mbele. Haiwezekani kila
siku mchezaji kucheza klabu moja tu. Mazungumzo ya kujiunga na Simba
yanaendelea, tutakapofikia mwafaka kila kitu kitawekwa wazi.
SWALI; Unajisikiaje kutakiwa na Simba?
BANDA;
Mchezaji anapokua kiakili, kimawazo na uwezo ni lazima ufikirie kwenda mbele
zaidi. Kutoka, Africans Sports, Coastal hadi Simba itakuwa hatua kubwa kwangu.
Kucheza timu kama Simba ni hatua lakini kunakuwepo na changamoto kubwa ya
presha ya mashabiki, na hapo ndipo mchezaji unatakiwa kuonyesha ni kiasi gani
umekomaa kimpira, kiakili na kimawazo. Kwangu itakuwa kawaida tu, nitacheza
kama navyocheza sasa na nipo tayari kwa changamoto mpya.
SWALI; Kuna
wachezaji wengi wazuri walitoka klabu nyingine na kujiunga na Simba wakiwa na
viwango vya juu, ila wameishia kucheza kwa viwango vya chini. Je, tutarajie
hivyo kwa upande wako?
BANDA;
Katika maisha kila mtu anakuwa na kitu anachotafuta. Tuseme ukweli, wachezaji
wengi wa Kitanzania tumelelewa katika mazingira magumu sana. Huwezi kujua, Mtu
mwingine akifika pale anajenga hali ya kuridhika na kiasi anachokuwa anakipata
kwa kuwa hajawahi kukishika katika maisha yake na kujiona kuwa ameshamaliza.
Nitaendelea kuwa, Abdi Banda yuleyule kitabia, sitaridhika zaidi ya kuongeza
juhudi na maarifa. Simba si mahala kwa mwisho kwangu, nina ndoto na fikra za
kucheza mbele zaidi.
SWALI; Tayari umeshaichezea timu ya Taifa, na leo
( jana) umeiwakalisha timu ya Taifa ya vijana, U20, Ngorongoro Heroes,
unachukuliaje kucheza michezo ya kimataifa?
BANDA;
Mpira wa kimataifa si rahisi, unakwenda uwanjani ukiwa humjui mpinzani wako
hiyo ni moja ya sababu ya kusema mchezaji amekomaa, kucheza mechi za kimataifa
ni tofauti kabisa unapokuwa ukicheza katika ligi kuu yetu. Kadri mchezaji
unapokuwa unaongeza idadi ya mechi za kimataifa basi ni lazima uonyeshe
umekomaa kiuchezaji na kuonekana
umefikia malengo fulani. Kucheza mechi za kimataifa ni moja kati ya sifa ambazo
nazitaka katika maisha yangu ya soka.
SWALI; Ngorongoro wamefungwa leo ( jana) na
Nigeria. Timu ilionekana kucheza vizuri, lakini ikaadhibiwa na umakini mdogo wa
wachezaji na kujikuta mkipoteza mchezo kwa magoli 2-0, je, kuna nafasi ya
kukomboa magoli hayo katika mchezo wa ugenini na kufuzu kwa hatua inayofuata?
BANDA; Kitu
ambacho sisi Watanzania tunakosa ni maandalizi. Maandalizi nikimaanisha kuwa ni
lazima tukubali hasara. Tunasema tunahitaji U20, ya leo ndiyo iwe timu ya
Taifa, U23 katika kipindi cha miaka miwili, mitatu ijayo kisha ije kuwa timu ya
Taifa katika miaka ya mbele. Tanzania hakuna hata mwaka mmoja ambao tunaamini
kwamba timu ya ' Taifa ni hii hapa'.Kila siku tunatafuta timu mpya ya Taifa,
tunapanga hivi, mara vile.
Mfano mzuri
kwetu ni hawa, Nigeria waliotufunga leo ( jana). Miaka miwili iliyopita
walichukua ubingwa wa U17, wamekuzwa vizuri wakawa pamoja, wameongeza wachezaji
wawili, watatu na baadae wanataka iwe timu yao ya U23. Tutaweza kushinda vipi
na timu kama hii, kwa maandalizi haya hata tukikutana katika U23, miaka mitatu
ijayo watatushinda tu. Na, hawajaishia hapo wana mawazo kuwa baada ya miaka
kadhaa ijayo iwe timu yao ya Taifa. Ni vigumu kusonga mbele, ila tutakwenda
kupambana, mechi bado haijamaridhika.
Kitu gani ungependa kuwaambia wapenzi wa soka
Tanzania kuhusu timu zao za Taifa?
BANDA; Wana haki ya kutuzomea, ila wafikirie
wanakuwa wakifanya hivyo kwa wachezaji wanaotoka wapi. Leo, mtu anaizomea timu
ya Taifa wakati ina wachezaji ambao hawachezi hata ligi ligi kuu. Mashabiki
tunajua wanachoshwa na matokeo yetu, ila ni lazima watambue kuwa maandalizi
yaliyopo katika timu za TAifa za Vijana ni hafifu sana, watuache tucheze mpira,
wasiwe na haraka ya kupata mafanikio wakati ukweli bado hatujafanya uwekezaji
katika timu za vijana.
ASANTE, na kila la heri katika mchezo wako.
BANDA; Nawe, pia shukrani sana.
0 comments:
Post a Comment