MTIBWA SUGAR YAJIPANGA KUSAKA NYOTA WAPYA!!

Na Baraka Mpenja, Dar es salaam

MABINGWA wa zamani wa Tanzania kwa mwaka 1999 na 2000, Mtibwa Sugar wamekiri kukumbana na changamoto kubwa msimu wa 2013/2014 wa ligi kuu Tanzania bara uliomalizika aprili 19 mwaka huu .

 Afisha habari wa klabu hiyo, Tobias Kifaru Lugalambwike ameueleza mtandao huu kuwa kitu kikubwa walichojifunza ni maandalizi makubwa ya baaadhi ya timu zinazoshiriki ligi kuu toafuti na wao.

“Sisi ni wakongwe katika ligi hii, lakini tumeshindwa kuonesha cheche kutokana na kuwepo kwa timu zenye kiwango kizuri. Mbeya City fc wametikisa kweli, sio kwetu tu hata Simba na Yanga wamekumbana na upinzani na ndio maana wamekosa ubingwa ”.

“Kikubwa tumebaini changamoto zetu ikiwemo kukosa wachezaji muhimu kikosini. Tunataka kufanya usajili mzuri ili tuanze maandalizi ya mapema”.

“Kufikia mwezi juni lazima mchakato wa mazoezi utaanza. Tumechoshwa na kuboronga isivyo kawaida yetu”. Alisema Kifaru.

Kifaru aliongeza kuwa katika usajili wanaotarajia kufanya, kama kawaida yao hawataangalia majina makubwa kwasababu Mtibwa ni kitalu cha kuzalisha wachezaji.

“Tumekuwa tukizalisha wachezaji bora wanaowaniwa na Simba na Yanga, lakini hatuchoki kwasababu sisi ni kitalu. Tunahaha kutafuta nyota wengine watakaotusaidia msimu ujao”. Alisema Kifaru.

Akizungumzia maamuzi ya waamuzi msimu huu, Kifaru alisema kwa upande wao hawana tatizo nao, lakini aliwataka kuboresha zaidi viwango vyao kwasababu kuna wakati walikuwa wanaharibu uhondo wa mechi.

“Waamuzi wamefanya kazi yao vizuri, tunajua yapo makosa ya kibinadamu. Cha msingi wazichukue changamoto zao ili wazifanyie  kazi kabla ya msimu mpya kuanza”.

“Tunatarajia ligi ngumu zaidi msimu ujao. Kuna timu za wananchi zimeshapanda ligi kuu. Nadhani zinaweza kuwa kama Mbeya City, hivyo waamuzi lazima wajisahihishe makosa yao mapema na kujipanga upya”. Alisema Kifaru.

Mtibwa Sugar msimu huu imemaliza katika nafasi ya 7 baada ya kujikusanyia pointi 31 kibindoni.