LALA SALAMA YA KUUZA TIKETI KOMBE LA DUNIA YAANZA, MASHABIKI LUKUKI WANUNUA!!

NGWE ya mwisho ya uuzaji wa tiketi kuelekea kombe la dunia litakalofanyika mwezi juni mwaka huu nchini Brazil imezinduliwa jana na tiketi 126, 837 kati ya 199, 519 zilizotolewa  na FIFA kwa mechi 54 kati ya mechi 64 ziliuzwa ndani ya saa nne tu.

FIFA walisema wenyeji Brazil waliomba theluthi 2 katika oda ya mwisho ambazo ni tiketi 80, 496, huku tiketi 46, 341 zikienda mataifa mengine.

FIFA waliongeza kuwa vituo 12 vya kuuza tiketi katika nchi mwenyeji vitafunguliwa Ijumaa , lakini maeneo  ya Brasilia na Porto Alegre tiketi zitapatikana kuanzia  mwezi ujao tu.

Hata hivyo FIFA wamewaeleza mashabiki walionunua tiketi kuwa wanatakiwa kupanga ahadi ya kuzikusanya kupitia mtandao wa Fifa.com.

Kuanzia juni mosi hadi siku ya fainali Julai 13, FIFA wamesema tiketi zitakuwa zikiuzwa kwenye vituo maalum nchini Brazil.

Mechi zilizouza zaidi tiketi katika ngwe hii ya mwisho ni fainali ya Julai 13, juni 12 kati ya mwenyeji Brazil v Croatia, Mexico v Cameroon, England v Italia, Argentina v Bosnia, Brazil v Mexico, mabingwa watetezi Hispania v Chile, Cameroon vs Brazil, Croatia v Mexico na Australia v Spain.

“Tumebakiwa na takribani miezi miwili kufikia fainali za kombe la dunia, hii ni nafasi ya mwisho kwa mashabiki kujipatia tiketi za michuano hii mikubwa zaidi duniani”. Alisema Thierry Weil ambaye ni meneja mauzo wa tiketi wa FIFA.

Kufikia jana FIFA walisema jumla ya tiketi 2 577 662 tayari zilishauzwa.