JASHO LAWATOKA WATU MBEYA, MECHI YA MBEYA CITY VS AZAM FC HAPAKALIKI, UWANJA WA SOKOINE WAMEREMETA!!

Maofisa wa Azam fc wakikagua uwanja wa Sokoine asubuhi hii

Na Baraka Mpenja

 DIMBA la Kumbukumbu ya Sokoine jijini Mbeya lipo katika hali nzuri asubuhi hii kuelekea mtanange wa kukata na shoka leo jioni baina ya vinara wa ligi kuu soka Tanzania bara, Azam fc dhidi ya Wagonga nyundo wa Mbeya, Mbeya City fc.

Maofisa wa Azam fc wamekagua uwanja huo asubuhi ya leo na kukubali ubora wake.

Mbeya City wenye rekodi ya kutofungwa nyumbani kwao wanawakabili Azam fc wanaohitaji pointi tatu tu kujitangazia ubingwa wao wa kwanza tangu waanze kushiriki ligi kuu msimu wa 2008/2009.

Kuelekea katika mechi hiyo, haya ndio maneno ya kocha wa Mbeya City, Juma Mwambusi;

"Tunatambua Azam hawajapoteza mechi, lakini lazima wajue tunahitaji kulinda heshima pia ya kutofungwa kwenye uwanja wetu wa nyumbani msimu huu. Tutambana hadi dakika ya mwisho ili tushinde mechi hiyo," .

Azam fc wapo kileleni kwa pointi 56 na kama watashinda mchezo wa leo watafikisha pointi 59 ambazo hazitaweza kufikiwa na Yanga hata wakishinda mechi zao mbili walizosaliwa nazo.

Wakimalizana na kipute cha leo, Azam fc watakuwa wanasubiri mechi ya kufungia msimu dhidi ya JKT Ruvu uwanja wa Azam Complex, Chamazi, jijini Dar es salaam.

Nao Yanga wanashuka dimbani huko Shk. Abeid Jijini Arusha dhidi ya JKT Oljoro.

Ushindi ni muhimu kwa Yanga kwasababu ili kujipa matumaini ya kutetea ubingwa wao wanahitaji kushinda mechi zao mbili zilizosalia.

Kama Yanga watashinda leo watafikisha pointi 55, wakati wakisubiria nini kitatokea Mbeya.

Endapo  Azam fc watapoteza mechi ya Mbeya na Yanga wakishinda, basi matumaini ya kutetea ubingwa wao yatakuwepo kutegemeana na matokeo ya mechi ya mwisho ya Azam fc.

Mpaka sasa Yanga wamejikusanyia pointi 52 katika nafasi ya pili baada ya kucheza mechi 24.

Mechi nyingine itapigwa katika dimba la Taifa ambapo Wekundu wa Msimbazi Simba watawakaribisha wauza mitumba wa Ilala, Ashanti United.

Nayo Mtibwa Sugar itacheza na Ruvu Shooting (Uwanja wa Manungu, Morogoro), huku Mgambo Shooting na Kagera Sugar zitaoneshana kazi kwenye Uwanja wa Mkwakwani jijini Tanga .