ASKOFU DR BOAZ SOLLO ATANGAZA MAOMBI YA KUWAOMBEA WAJUMBE WA BUNGE LA KATIBA KUFANYA MAAMUZI KWA KUVUMILIANA

Na  Francis Godwin Blog 
WAKATI macho na masikio  ya  watanzania yakielekezwa bunge la Katiba  mjini Dodoma  kuona Tanzania  inapata katiba mpya ,Askofu maarufu  na mtabiri  wa mambo  mbali mbali nchini  Dr Boaz Sollo (pichani )wa kanisa la Overcomers Power Centre Iringa ametangaza kufunga na kuomba kwa ajili ya  kuliombea  bunge la katiba  ili wajumbe  kufanya maamuzi bila kukwazana.

Dr Sollo ambae  amepata  kutoa utabiri  wake mwishoni mwa  mwaka jana  kuwa watanzania kwa mwaka  huu watapata  neema kubwa ya mvua  na  kutokea kwa mafuriko mkoani Morogoro pamoja na maeneo ya  ukame kama Isimani  kuwa na  mvua ,alisema  kuwa anatabiri  neema ya katiba  bora  iwapo watanzania  watazama katika maombi  ya  kuliombea Taifa .

Akizungumza na waandishi wa habari hizi jana  kuhusu  maombi  hayo ya opresheni ya kutokomeza uchawi na laana pamoja na kuliombea bunge la katiba ,askofu Dr Sollo  alisema  kuwa  mbali ya  watanzania waliowengi  kuonyesha kukata tamaa juu ya mwenendo wa   wajumbe wa  bunge la katiba mjini Dodoma  kutokana na marumbano yasiyo kwisha  ila  bado imani ya Rais Dr Jakaya  Kikwete kuona mchakato  huo wa katiba unamalizima  kwa  kuwa na katiba bora .

Kwani  alisema  kuwa  wajibu  wa kanisa  lake na viongozi  wengine wa  dini  ni kuwaelekeza  waumini  wao katika maombi zaidi  ili kuwaombea  wajumbe wa  bunge  hilo la katiba  ili  kufanya maamuzi  ya msingi katika kuiandaa katiba  hiyo  pasipo  kutanguliwa na jazba yoyote .

” Nchi  yetu  ina  idadi ya  watu zaidi ya  milioni 40 na  wajumbe  waliopo  bungeni Dodoma ni chini ya  watanzania 1000 hivyo  ni imani ya  watanzania  waliowengi  kuona wajumbe  hao wanaifanya kazi hiyo ya wengi kwa  kutanguliza maslahi ya Taifa na kila uamuzi  watakaoufanya  ni lazima  kumtanguliza Mungu  ili ashushe baraka  zake”

Hata  hivyo  alisema  kuwa  si  wakati wa wajumbe wa  bunge hilo la katiba kuanza kurumbana kwa hotuba ya Rais Dr Kikwete wakati wa uzinduzi wa  bunge   hilo badala  ya kuifanya kazi  iliyopo mbele yao ya kuipitia rasmu ya katiba na  kuandaa katiba ya  watanzania .

Alisema akiwa ni kiongozi wa kanisa la Overcomers Power Centre Iringa anatambua mchango  mkubwa  wa  viongozi wa Taifa  hili  chini ya Rais Dr Kikwete ambae ameweza  kuiongoza nchi kwa hali ya amani na utulivu na hata  wananchi  wake  wakiendelea  kutumia uhuru  wao wa kuabudu tofauti na nchi nyingine ambazo kila  kukicha ni machafuko ya kitini na kisiasa .

“Ni  jambo la kumshukuru Mwenyezi  Mungu muumba wa mbingu na nchi kwa  kulijaria mema Taifa la Tanzania chini ya kiongozi wake Rais Dr Kikwete ……wajibu wetu kama kanisa la Overcomers Power Centre Iringa na wajibu wa viongozi wote wa  dini na waumini wao ni kuendelea kuliombea Taifa “alisema askofu Dr Sollo 

Akielezea  kuhusu utabiri  mbali mbali ambao amepata  kuufanya ukiwemo  wa  neema ya mvua kwa Taifa kwa mwaka  huu na machafuko ya nchi za  jirani askofu Dr Sollo  alisema amekuwa akiyafanya  hayo kutokana na maono mbali mbali ambayo Mungu amekuwa akimuonyesha  wakati  wote na  hivyo hataacha  kuwaeleza  watanzania maono  mbali mbali atakayoonyeshwa .

Katika  hatua  nyingine  askofu Dr  Sollo ameeleza mafanikio makubwa ambayo Mungu ameendelea kulijalia kanisa  lake hasa katika kufanikisha ujenzi wa kanisa la Kisasa ujenzi  unaoendelea  eneo la Zizi la Ng’ombe kwa  nguvu za  waumini wa kanisa  hilo na wa nje ya kanisa  hilo ambao wamekuwa  wakifurahishwa na huduma ya maombezi  inayofanyika na  kuwa kamwe siku  zote mbali ya kumshukuru Mungu kwa kazi hiyo ila bado ataeneza mbegu ya amani na upendo kwa  watanzania .