YANGA KAMILI GADO MISRI, HANS VAN KUSHAMBULIA MWANZO MWISHO, WAARABU JOTO LAZIDI KUPANDA!!

Na Baraka Mpenja , Dar es salaam

0712461976/0764302956

ZIMEBAKI saa chache kuwashuhudia wawakilishi pekee wa Tanzania kwenye mashindano ya Klabu Bingwa Barani Afrika,  Young Africans Sports Club wakioneshana shughuli pevu dhidi ya mabingwa watetezi wa kombe hilo, National Al Ahly katika dimba la El Max Haras El Hodod jijini Alexandria.

Mchezo wa leo unatarajiwa kuanza majira ya saa 1:00 usiku kwa saa za Misri ambapo kwa sasa za Afrika mashariki itakuwa saa 2:00 usiku.

Yanga wana matumaini makubwa ya kuwafunga Al Ahly kutokana na matokeo ya mechi ya kwanza iliyopigwa uwanja wa Taifa machi mosi mwaka huu ambapo Wanajangwani walishinda bao 1-0.

Bao hilo pekee lilifungwa na nahodha wa Yanga na beki wa kati, Nadir Haroub `Canavaro` katika dakika ya 82.

Taarifa kutoka Misri kwa viongozi wa Yanga zinaeleza kuwa mpaka sasa hali ni shwari kabisa, wachezaji wapo salama na wana morali kubwa ya kupambana na Al Ahly usiku wa leo.

Kikosi cha Young Africans kiliwasili jana jijini Alexandria kikitokea jijini Cairo na usiku  kilifanya mazoezi katika uwanja utakaotumika kwenye kipute cha leo.

Wachezaji 20 waliopo Alexandria walifanya mazoezi chini ya makocha Hans Van der Pluijm, Charles Mkwasa pamoja na kocha wa makipa Juma Pondamali anayewanoa magolikipa.

Maandalizi ya mchezo huo ambao utaoneshwa na televison zaidi ya 8 za nchini Misri, yamekamilika na katika kikao cha maandalizi ya mechi kamisaa ameendelea kusisitiza kuwa mchezo hautakua na mashabiki wa aina yoyote.

Wakati hayo yakiriji huko Misri, waliokuwa wawakilishi wa Tanzania katika michuano ya kombe la shirikisho barani Afrika na washindani wa Yanga kuwania ubingwa msimu huu, klabu ya Azam fc imeitakia kila la heri Yanga katika mchezo wa leo.

Taarifa iliyowekwa kwenye ukurasa wa Azam fc katika mtandao wa kijamii wa facebook imesema kuwa;

“Klabu ya Azam FC inawatakia kila la kheri wawakilishi wa Tanzania kwenye michuano ya Klabu Bingwa,  Dar Young Africans ipate ushindi au sare na kuweza kuwatoa Al Ahly.”

“Ushindi wa Yanga leo ni ushindi wa watanzania wote. Mungu Ibariki Yanga, Mungu Ibariki Tanzania”.

Wachezaji waliopo nchini Misri na kufanya mazoezi ya mwisho leo jioni ni"

Magolikipa: All Mustafa "Barthez", Juma Kaseja, Deogratias Munish "Dida"

Walinzi: Juma Abdul, Mbuyu Twite, Oscar Joshua, David Luhende, Kelvin Yondani "Cotton", Nadir Haroub "Cannavaro"

Viungo: Haruna Niyonzima, Saimon Msuva, Athuman Idd "Chuji", Frank Domayo "Chumvi", Nizar Khalfani

Washambuliaji: Mrisho Ngasa, Said Bahanuzi, Emmanuel Okwi, Hamis Kizza, Jerson Tegete na Didier Kavumbagu 

Timu nzima ya mtandao huu inawatakia kila la kheri wawakilishi hao pekee wa Tanzania katika mashindano ya kimataifa.

Wachezaji, benchi la ufundi, viongozi na watanzania wachache waliopo Misri, waunganishe nguvu yao pamoja ili kuwavua ubingwa Al Ahly wakiwa kwao.

Okwi, Ngassa, Kiiza, Kavumbagu, Bahanuzi, Tegete, hakikisheni mnatumia vizuri nafasi mtakazobahatika kuzipata. Kumbukeni watanzania wapo nyuma yenu.

`Canavaro` unganisha nguvu katika beki yako. Wewe ni nahodha, hakikisha unawatia moyo vijana muda wote mtakapokuwa uwanjani.

Niyonzima, Domayo pale katikati chezeni kwa umoja na wachezaji wenzenu. Pigeni pasi kwa kwenda mbele, hakika mnategemewa sana.

Msilaumiane hata kidogo, peaneni maelekezo kwa busara, pambaneni mwanzo hadi mwisho. Tunafahamu utakuwa mchezo mgumu sana, lakini kila kitu kinawezekana.

Mungu Ibariki Young Africans, Mungu Ibariki Tanzania .