HANS VAN KUTUMIA MFUMO WA KUSHAMBULIA TANGU DAKIKA YA KWANZA DHIDI YA AL AHLY KESHO!!

 

 Na Baraka Mpenja , Dar es salaam

0712461976/0764302956

Wawakilishi  pekee wa Tanzania katika michuano ya ligi ya mabingwa barani Afrika, Dar Young Africans tayari wameenda mjini Alexandria kujiandaa na mchezo wa kesho katika Uwanja wa Border Guard stadium (Haras el Hadod) dhidi ya mabingwa watetezi wa klabu bingwa Afrika, National Al Ahly ya Misri.

Kuelekea katika mchezo huo, kocha wa Yanga, Hans Van Pluijm amesema lazima Yanga leo hii waupime uwanja huo kwa kufanya mazoezi mepesi kabla ya mtanange wa kesho.

Kocha huyo Raia wa Uholanzi alisema kikosi chake kipo imara na matarajio ya benchi la ufundi ni kuwatoa waarabu hao ambao walifungwa bao 1-0, katika mchezo wa kwanza uwanja wa Taifa jijini Dar es salaam, machi mosi mwaka huu.

Bao hilo pekee lilitiwa kambani na beki wa kati na nahodha wa Yanga, Nadir Haroub `Canavaro` katika dakika ya 82.

“Tutawashambulia Al Ahly tangu dakika ya mwanzo ili tuanze kufunga bao,'’Kwenye mchezo wa Dar Ahly waliwatumia wachezaji tisa nyuma ya mpira na bado tulifanikiwa kutengeneza nafasi nyingi,naamini kesho watalazimika kutushambulia. Nasisi tutatumia mwanya huo huo kuwashambulia''. Alisema  Hans Van Pluijm.

Wakati hayo yakijiri huko Cairo, mshambuliaji na mlinda mlango wa zamani wa Yanga na timu ya Taifa ya Tanzania, Kitwana Manara `Popat` amewatakia kila la heri wanajangwani hao katika mchezo wa kesho.

Manara katika mahojiano maalumu na mtandao huu aliwataka wachezaji wa Yanga kucheza kwa nguvu na kuondoa mawazo ya kuwafunga waarabu kirahisi.

“Al Ahly watacheza kwa nguvu sana kesho. Watafunguka na kuwashambulia sana Yanga. Kwa mtazamo wangu, kocha wa Yanga nayeye atumie mfumo wa kushambulia ili kuwapunguza kasi waarabu. Endapo Yanga watajihami zaidi itakuwa ngumu sana kupata ushindi”. Alisema Manara.

Pia aliwataka wachezaji kutokata tamaa hata wakifungwa mapema, bali wapigane kufa na kupona kama walivyofanya Simba dhidi ya Zamalek mwaka 2003.

Mchezaji mwingine wa zamani wa Yanga na timu ya Taifa ya Tanzania aliyeitakia kila la kheri klabu hiyo hapo kesho ni Shaban Katwila ambaye kwa upande wake amesema umoja wa wachezaji uwanjani ndio itakuwa silaha ya ushindi.

“Kama walishikama Dar es salaam na kuwafunga waarabu, basi hapo kesho wacheze kwa kujituma. Wasilaumiane inapotokea makosa, bali waelekezane na kutiana moyo katika mchezo huo ambao utakuwa mgumu kwao. Nawaombe ushindi kwa mwenyezi Mungu”. Alisema Katwila

Naye Seklojo Johnson Chambua, mchezaji wa zamani wa Yanga na Taifa Stars, aliwatakia ushindi Yanga katika mtanange huo.

“Yanga waamini kuwa waarabu wanafungika. Najua mazingira ya mchezo ni mgumu, lakini huu si wakati wa kuzungumza mengi. Tumeshauri mengi, wamefanya maandalizi mazuri, imani yangu ni kwamba wataweza kufanya vizuri. Cha msingi wasipoteze nafasi kama watabahatika kuzipata”. Alisema Chambua.

Mtandao huu unaitakia kila la kheri klabu ya Yanga.

Mungu Ibariki Yanga, Mungu ibariki Tanzania.