HALL AKIRI LIGI KUU MSIMU HUU NI BORA, APONDA UBABAISHAJI WA VIONGOZI SOKA LA BONGO!!

Kocha wa zamani wa Timu ya Taifa ya Zanzibar na Azam fc, Sterwart John Hall

Na Baraka Mpenja , Dar es salaam

0712461976 au 0764302956

WAKATI ligi kuu soka Tanzania bara ikiwa wakati wa magharibi kwa maana ya lala salama, aliyekuwa kocha wa zamani wa Timu ya Taifa ya Zanzibar, Zanzibar Heroes na klabu ya Azam fc mpaka mwishoni mwa mzunguko wa kwanza msimu huu wa 2013/2014, Mwingereza Sterwart John Hall amesema msimu huu una ushindani mkubwa zaidi ya msimu uliopita.

Katika mahojiano maalumu na mtandao huu, Hall alisema imekuwa jambo zuri kuibuka kwa timu ngumu kama Mbeya City, lakini bado kuna timu dhaifu nyingi kitu ambacho si kizuri katika ligi.

“Nikiwa kocha wa mpira, lazima nisema ukweli, msimu huu umekuwa bora zaidi, lakini nadhani yanahitajika maboresho zaidi kwa klabu ili kupunguza udhaifu wa timu nyingi”. Alisema Hall.

Kocha huyo aliongeza kuwa imekuwa ikishangaza sana na ni jambo zuri pale timu ndogo zinapotoa changamoto kubwa  uwanjani dhidi ya timu kubwa za Simba, Yanga na Azam fc.

“Zinahitajika timu nyingi  zenye ubora kama Mbeya  City, hapo utaona ligi bora. Kuna timu za chini, hakika zimekuwa zikionesha kiwang duni sana na kuharibu utamu wa ligi”. Alisema Hall.

Pia alisema kiwango cha ufundishaji kwa makocha wa Tanzania ni kizuri, hivyo wanahitaji pongezi sana.

“Makocha wa Tanzania wanajitahidi  kufanya kazi yao. Wanatakiwa kuungwa mkono. Timu nyingi sana za Tanzania hutumia mfumo wa 4-4-2, si mbaya  kwani wanamudu vizuri. Nawapongeza kwa hilo”. Alisema Hall.

Hall alisisitiza kuwa mpira wa Tanzania unaharibiwa na baadhi ya viongozi ambao hushindwa kutekeleza majukumu yao kwa wakati.

Alitaja tatizo la wachezaji kutolipwa na kucheleweshewa mishahara, posho, malazi mabaya na migogoro isiyokuwa na ulazima.

“Wachezaji wanakuwa katika msongo wa mawazo. Kama mchezaji halipwi kwa wakati hawezi kucheza vizuri. Viongozi lazima wawathamini wachezaji wao kwani wao ndio msingi wa kuendeleza klabu zao”. Alisema Hall.

Pia aligusia suala la vipaji nchini Tanzania ambapo alieleza kuwa Taifa hili lina vijana wengi wanaojua mpira, lakini njia ya kutokea ni ngumu kwao.

“Nimekaa Songea mkoani Ruvuma na kuifundisha klabu ya Maji Maji, nimezunguka mitaani na kuona vipaji vya hali ya juu. Nadhani ipo haja ya viongozi wa mpira kukaa chini kuangalia namna ya kuwasaidia wachezaji hao”. Alisema Hall.

Aidha, aliwasifu wachezaji wa Tanzania kuwa waelewa katika mafundisho, lakini akakiri kuwa kuna changamoto kubwa za kufundisha kutokana na mazingira.

Wakati Hall akizungumzia suala la kuendeleza vipaji kwa vijana, tayari shirikisho la soka nchini Tanzania chini ya Rais wake, Jamal Malinzi limeshaanza mikakati ya kung`amua vipaji vipya kwa lengo la kuboresha Taifa stars.

Pia TFF wapo katika mkakati wa kuandaa mtaala wa kufundishia soka nchi nzima ambapo kocha mpya wa Taifa Stars atakayepatikana baada ya kuvunjwa kwa mkataba wa Kim Poulsen ndiye atafanya kazi hiyo kushirikiana na makocha wazawa.

Wakati hayo yakijiri, tayari wang’amuzi vipaji 28 wanakutana Lushoto mkoani Tanga kwa siku saba katika mpango maalumu wa maboresho ya Taifa Stars ambapo watatoka na orodha ya mwisho ya wachezaji waliopatikana katika mechi za maboresho hayo zilizochezwa nchi nzima.

Katika kikao hicho, wang’amuzi hao watapitia majina ya wachezaji walioteuliwa ikiwemo kuwaangalia tena kwenye video kwa vile mechi zote zilirekodiwa. Wachezaji watakaoteuliwa katika mpango huo baadaye wataingia kambini mkoani Mbeya.

Wang’amuzi vipaji ambao wanaoondoka Machi 9 mwaka huu kwenda Lushoto ni Abdul Mingange, Boniface Pawasa, Charles Mkwassa, Dan Korosso, Dk. Mshindo Msolla, Edward Hiza, Elly Mzozo, Hafidh Badru, Hamimu Mawazo, John Simkoko, Jonas Tiboroha, Juma Mgunda na Juma Mwambusi.

Kanali mstaafu Idd Kipingu, Kenny Mwaisabula, Madaraka Bendera, Madaraka Selemani, Mbarouk Nyenga, Mohamed Ally, Mussa Kissoky, Nicholas Mihayo, Peter Mhina, Salum Mayanga, Salvatory Edward, Sebastian Nkoma, Sekilojo Chambua, Selemani Jabir na Shabani Ramadhan.

Wengine ni Mjumbe wa Kamati ya Utendaji ya TFF ambaye pia ni Mwenyekiti wa Kamati ya Ufundi, Kidao Wilfred, Mjumbe wa Kamati ya Utendaji ya TFF ambaye pia ni Mwenyekiti wa Kamati ya Vijana, Ayoub Nyenzi, Kaimu Mkurugenzi wa Ufundi, Salum Madadi na Mshauri wa Rais (Ufundi), Pelegrinius Rutayuga.