Kinana amkalia kooni mkurugenzi Mbozi

 

Mbozi. Kaimu Mkurugenzi wa Halmashauri ya Wilaya ya Mbozi, Dk Charles Mkambachepa juzi alionja joto la jiwe baada ya Katibu Mkuu wa CCM,  Abdulrahaman Kinana kumtaka arudishe haraka Sh209 milioni za Saccos ya Chama cha Walimu zilizochukuliwa na halmashauri hiyo katika mazingira ya kutatanisha kuanzia Mei mwaka huu.

Hali hiyo ilijitokeza juzi jioni wakati Kinana alipozungumza na baadhi ya watumishi wa Halmashauri ya Wilaya ya Mbozi hususan walimu.

Dk Mkambachepa alilazimika kutamka wazi kwamba atahakikisha anawalipa fedha zote ifikapo mwishoni mwa Januari mwaka ujao na kwamba juzi hiyo aliwalipa zaidi ya Sh32 milioni kupunguza deni hilo.

Awali Kinana alipokea taarifa ya malalamiko lukuki ya walimu yakiwamo ya madai ya zaidi ya Sh1 bilioni na pia halmashauri kuchukua Sh209 milioni za makato ya walimu kwa ajili ya kurudisha mikopo ya Saccos.

Walimu walidai halmashauri hiyo chini ya Mkurugenzi mstaafu Edson Chelewa ilichukua fedha hizo ikidai zinatumika katika masuala ya kumpokea Rais Jakaya Kikwete kwenye sherehe za Mei Mosi zilizofanyika kitaifa mkoani Mbeya.

Kutokana na kauli hiyo, Katibu Mkuu wa CCM alisema huo ni uzushi wa hali ya juu na kuitaka halmashauri hiyo kuacha mara moja tabia ya kuwaonea walimu kwa kusingizia viongozi mambo mabaya ya fitina.

“Kuanzia sasa CCM imeamua kuingia kati kufuatilia matatizo ya walimu yakiwamo madai yao na kwa kweli itahakikisha yanalipwa” alisema.

Awali akihutubia mkutano wa hadhara kwenye Uwanja wa Baraza la Kata, Kinana aliwasihi Watanzania kuendelea kuiamini Serikali ya CCM akisisitiza inalenga kuwatetea wanyonge na kuboresha maisha.

CHANZO: MWANANCHI