KILI STARS VS UGANDA THE CRANES HATARI TUPU MOMBASA, SAMATTA, ULIMWENGU…OKWI, KIIZA KUONESHANA MAUJANJA YA UWANJANI!!

Na Baraka Mpenja 

Tel: 0712461976

KOMBE la Mataifa ya Afrika mashariki na kati , CECAFA Challenge 2013 limefikia patamu zaidi kwa mechi za kwanza za Robo fainali kupigwa leo hii Uwanja wa Manispaa, Mombasa, Kenya.

Mechi inayosubiriwa kwa hamu na kuvuta hisia za mashabiki wengi wa kandanda ni baina ya mabingwa watetezi, Korongo wa Kampala, Uganda The Cranes dhidi ya Nyota wa Kilimanjaro, timu ya Taifa ya Tanzania bara, The Kilimanjaro stars itakayoanza majira ya saa 8:00 mchana, ingawa kutakuwa na mech nyingine ya kukata na shoka kati ya wenyeji , Kenya dhidi ya Amavubi, Timu ya Taifa ya Rwanda majira ya saa 10:00 jioni.

Hata hivyo Kili Stars wanaingia uwanjani leo wakiwa na kumbukumbu mbaya na unyonge wa kufungwa kwa mfululizo na Uganda katika mechi za hivi katibuni.

Uganda inayonolewa na kocha mahiri na aliyewahi kufanya kazi na Yanga ya Dar es salaam, timu ya Taifa ya Rwanda na maeneo mengine Afrika , Mserbia Milutin Sredojevic ‘Micho’ itaingia uwanjani na nguvu na ujasiri zaidi kutokana na matokeo mazuri ambayo imekuwa ikipata siku za karibuni dhidi ya stars.  

Mungu ibariki Tanzania, Mungu ibariki Kilimajaro Stars leo hii

Taifa stars ambayo kwa kiasi kikubwa inaundwa na wachezaji wa Kilimanjaro stars katika mechi mechi mbili za karibuni za kuwania kucheza fainali za mataifa ya Afrika kwa wachezaji wa ndani, CHAN, ilifungwa nyumbani na ugenini na The Cranes.

Ilikula 1-0 uwanja wa Taifa jijini Dar es salaam, ikaenda kumalizwa jijini Kampala uwanja wa Nelson Mandele Namboole mabao 3-1.

Katika michuano ya CECAFA mwaka jana mjini Kampala nchini Uganda, Kili stars ilivaana na Uganda katika mchezo wa nusu fainali  na kula kisago kama kawaida cha mabao 3-0.

Katika mchezo wa mwaka jana, Uganda walikuwa tishio kubwa zaidi kutokana na uwezo mkubwa wa wachezaji wao wakiwemo Emmanuel Okwi na Khamis Kiiza., hivyo waliwazidi Stars kwa kila kitu uwanjani.

Mwaka huu, Stars imetinga robo fainali kwa kushindi mechi mbili dhidi yya Somali 1-0, Burundi 1-0 na sare ya bao 1-1 na waliowahi kuwa mabingwa wa Afrika, timu ya Taifa ya Zambia `Chipolopolo`  na kushika nafasi ya pili ya Kundi B.

Kwa upande wa Uganda, ni balaa tupu, wametinga robo fainali kwa kushinda mechi zote za kundi C wataalamu wengi wa soka wanapenda kuita ushindi wa asilimia mia moja,

 

Mchawi!: Emmanuel Anord Okwi ni miongoni mwa Waganda wenye akili kubwa ya mpira, huwa ni hatari sana na ukicheza naye vibaya unavuna mabua

Wakati homa ya pambano ikizidi kupanda, makocha wa timu zote tayari wameshamwaga sera zao huku kila mmoja akiongea kwa tahadhari kubwa zaidi.

Koha wa Kili Stars Mdenmark, Kim Paulsen ameseme mechi ni ngumu na anawaheshimu sana Uganda kwani ni timu nzuri yenye wachezaji wakali, lakini amejiandaa kupambana kufa na kupona katika mchezo wa leo.

Micho kwa upande wake amekiri ubora wa Stars hasa baada ya kuwasili kwa Mbwana Samatta na Thomas Ulimwengu wanaocheza TP Mazembe ya DRC Kongo, lakini akiwemo pia Mjomba Mrisho Khalfan Ngassa.

Ukiangalia maneno ya makocha wote wawili, kwa haraka haraka utagundua kuwa wanaogopana sana kuelekea mchezo huu na hii inadhihirisha mchezo utakuwa mgumu sana.

Safu ya ushambuliaji ya Stars  leo inatarajiwa kuongozwa na Mrisho Ngassa, Thomas Ulimwengu na  Mbwana Samatta wakati viungo wanaweza kuwa Frank Domayo, Salum Abubakar ‘Sure Boy’ na Athumani Iddi ‘Chuji’.

 

Thomas Ulimwengu ana machungu sana na Waganda leo, anatamani muda ufike akawaoneshe kazi kama afanyavyo huko TP Mazembe

Langoni ataanza Mkongwe Ivo Philp Mapunda, kulia Himid Mao, kushoto Erasto Nyoni na katikati Said Morad na Kevin Patrick Philip Yondan.

Kwa upande wa mabingwa watetezi, Uganda, Emanuel Anord Okwi, Hamisi Friday Kiiza na Dani Sserunkuma wanatarajiwa kuongoza safu ya ushambuliaji, wakati wengine kikosini watakuwa Nico Wadada, Godfrey Kizito, Khalid Aucho, Brian Majwega, Vincent Kayizzi, Godfrey Walusimbi, Savio Kabugo na Benjamin Ochan langoni.  

 

Fundi wa Jangwani!: Khamis Friday Kiiza ni hatari tupu ukimwachia

Robo fainali za pili zitapigwa kesho ambapo Zambia wakatakabiliana na Burundi, huku Ethiopia wakioneshana kazi na Sudan.

Mungu ibariki Tanzania, Mungu Ibariki Kilimanjaro Stars.