YANGA MZIGONI NOVEMBA 25, BAADA YA KUMSAJILI KASEJA, WAPEPESA MACHO KUSAKA NYOTA WENGINE, NANI MTANI JEMBE KITAELEWEKA DHIDI YA SIMBA!!

Na Baraka Mpenja , Dar es salaam

MABINGWA watetezi na vinara wa ligi kuu vodacom Tanzania bara , Dar Young Africans wanaanza kunoa makali yao novemba 25 mwaka huu ili kujiweka sawa zaidi kuelekea mzunguko wa pili wa ligi hiyo pamoja na michuano ya kimataifa.

Kaimu katibu mkuu wa Yanga, Lawrence Mwalusako amesema klabu hiyo inakabiliwa na michunao mikubwa na malengo yao ni kupata mafanikio zaidi ya miaka ya nyuma, kuanzia ligi kuu na ligi ya mabingwa barani Afrika.

“Kwasasa vijana wako likizo ya wiki mbili,  watawasili novemba 24 mwaka huu, program zote zitakamilika wakati huo ambapo benchi zima la ufundi litakuweopo. Tuna mechi dhidi Ya Simba Sc katika kampeni ile ya Nani Mtani Jembe, tunarudi kujiandaa vizuri, lakini pia tunajiandaa na michuano ya ligi kuu na ligi ya mabingwa”. Alisema Mwalusako.

Mwalusako aliongeza kuwa moja ya mikakati yao kwa sasa ni kusaka wachezaji wa kuongeza kikosini, na kwa kuanza wamelamba dume, Kipa Juma Kaseja Juma ambaye timu yake ya zamani, Simba sc ilishindwa kumwongezea mkataba mpya baada ya mkataba  wake kumalizika mwishoni mwa msimu uliopita.

“Wewe unamwonaje Kaseja?, kamati ya usajili ilipata mapendekezo kutoka benchi la ufundi kuwa kipa huyu anafaa kutokana na kiwango chake na uzoefu mkubwa, hivyo ataisaidia timu sana. Lakini pia tunapepesa macho huku na kule kuangaliwa nyota wengine, wapo watu wa usajili wanafanya kazi yao vizuri”

Kisichokufaa wewe chamfaa mwenzio, Simba sc walisema kashuka kiwango na kupotezea kumpa mkataba mpya, lakini watani zao Yanga wameona jamaa bado yumo

Kiongozi huyo amewaomba mashabiki na wanachama wa klabu hiyo kuipa sapoti timu yao kwani umoja ni nguvu, utengano ni udhaifu.

Mwalusako alisema ni jambo la kawaida kwa mashabiki kusikitika pale timu inaposhindwa kufanya vibaya, na katika mazingira hayo misuguano inakuwepo na mwisho wa siku kitu kimoja cha msingi kinapatikana.

“Mashabiki wetu wana uchu wa mafanikio, tunatambua hilo, na ndio maana tunaongeza nguvu zaidi. Cha msingi tuungane pamoja ili kufikia malengo yetu”. Alisema Mwalusko.

Yanga walimaliza mzunguko wa kwanza novemba saba mwaka huu kwa kuifunga mabao 3-0 klabu ya JKT Oljoro katika dimba la Taifa jijini Dar es salaam na kupanda kileleni mwa ligi kuu baada ya kufikisha pointi 28, tofauti ya pointi moja na Azam fc wenye pointi 27 nafasi ya pili na Mbeya City nafasi ya tatu wakijikusanyia pointi 27, tofauti ni wastani wa magoli ya kufunga na kufungwa.