Rose Muhando kufanya makubwa Tamasha la Krismasi!!

Na Samia Mussa

MALKIA wa muziki wa injili nchini Rose Muhando, amesema kuwa mashabiki wake watarajie mabadiliko makubwa katika Tamasha la Kimataifa la Krismasi linalotarajia kufanyika Desemba 25 katika Uwanja wa Taifa jijini Dar es Salaam.

Akizungumza na Dira ya Mtanzania juzi mwimbaji huyo alisema anatarajia kufanya makubwa katika Tamasha hilo tofauti na alivyozoeleka katika matamasha yaliyowahi kufanyika.

“Siku ya Krismasi ni siku ya kuzaliwa mtoto wa kiume ambaye ni Yesu, unajua mara nyingi mzazi anapojifungua huwa ni furaha ya aina yake, nitaitumia siku hiyo kumuimbia Mungu kwa sababu ni siku muhimu,” alisema Muhando.

Rose alisema kuwa kwa sasa amebadilika kila kitu ikiwa pamoja na staili za uchezaji sambamba na kuimba nyimbo mpya tatu alizozikalisha kurekodi hivi karibuni.

“Mashabiki watarajie kupata mambo mapya kutoka kwangu kwa sababu nina amani ya Mungu, imeniwezesha kufikia hapa nilipo,” alisema Rose.

Msanii huyo alisema kuwa anamshukuru Mungu na anafuraha kubwa kupata nafasi ya kushiriki katika Tamasha la Krismasi na atatambulisha nyimbo tatu mpya ambazo ni Kamata, Shikilia na Usiniache ewe bwana.

Msanii huyo nguli wa muziki wa injili ambaye anakubalika Afrika Mashariki, alisema katika Tamasha hilo ataimba live ambapo anatarajia kuimba nyimbo mbalimbali zilizopo katika albamu zake ukiwamo wa Utamu wa Yesu, si salama, Nibebe na Jipange Sawa sawa.

Alipotakiwa kutoa ufafanuzi kama kuna msanii wa nje anamhofia alisema kuwa anajiamini na kile anachokifanya na waumini watarajie kwa sababu hivyo hakuna mwimbaji yoyote atakaye muogopa siku ya tamasha hilo la kimataifa.