NBS KUENDELEA KULINDA UBORA WA TAKWIMU ZAKE BARANI AFRIKA

 

Kaimu Mkurugenzi wa shughuli za kitakwimu Bi.Aldegunda Komba akitoa ufafanuzi wa ushiriki wa Tanzania katika maadhimisho ya Siku ya Takwimu Afrika kwa mwaka 2013. Maadhimisho hayo yatafanyika Novemba 20 jijini Dar es salaam.

Na Aron Msigwa – MAELEZO,  Dar es salaam.

Ofisi ya Taifa ya Takwimu imesema kuwa itaendelea na jukumu la kukusanya na kutoa takwimu Bora zinazokidhi mahitaji na viwango vinavyokubalika kimataifa ili kuiwezesha serikali na wadau mbalimbali kufanya maamuzi sahihi katika mipango ya maendeleo.

 

Kauli hiyo imetolewa leo jijini Dar es salaam na Kaimu Mkurugenzi wa shughuli za kitakwimu Bi.Aldegunda Komba wakati akitoa ufafanuzi wa ushiriki wa Tanzania katika maadhimisho ya Siku ya Takwimu Afrika kwa mwaka 2013.

 

Bi. Aldegunda amesema  maendeleo ya serikali yoyote ile duniani yanategemea uwepo wa takwimu Bora ambazo hurahisisha utungaji wa sera sahihi na upangaji wa mipango ya maendeleo ya wananchi kwa kufuata vipaumbele na fursa zilizopo.

 

Ameongeza kuwa takwimu bora huiwezesha serikali kufanya maamuzi sahihi na kutathmini mwenendo na mafanikio ya mipango mbalimbali inayopangwa na kukidhi mahitaji ya wadau mbalimbali kwa kuwapatia taarifa za Afya, kilimo, watu na makazi, taarifa za mapato na matumizi ya kaya.

Amesema Tanzania ikiwa miongoni mwa nchi zinazothamini mchango wa takwimu kwa maendeleo ya taifa inaungana na mataifa mengine barani Afrika kuadhimisha Siku ya Takwimu Afrika ambayo huadhimishwa tarehe 18 Novemba.

 

Ameeleza kuwa hiyo nchini Tanzania itaadhimishwa tarehe 20 jijini Dar es salaam chini ya kauli mbiu isemayo “Takwimu Bora kwa Maendeleo ya Afrika” ikilenga  kuifahamisha jamii juu ya umuhimu wa matumizi ya Takwimu bora katika kuleta maendeleo ya kiuchumi na kijamii barani Afrika.

Kuhusu ufanisi wa ukusanyaji wa takwimu Bora wa Tanzanzania ikilinganishwa nan chi nyingine barani Afrika Bi. Aldegunda amefafanua Ofisi ya Taifa ya Takwimu hutoa takwimu zake kwa kuzingatia sifa mbalimbali za upataji wa takwimu bora zikiwemo za matumizi ya mbinu na viwango vinavyokubalika kimataifa.

 

Pia ameongeza kuwa takwimu zote zinazotolewa na Ofisi ya Taifa ya Takwimu huakisi hali halisi ya eneo husika pia takwimu hizo  hutolewa kwa wakati maalum.