KABANGE: KAGERA SUGAR KUONGEZA NYOTA SAFU YA ULINZI, KIUNGO, MZUNGUKO WA PILI MTU HALAZI DAMU NG`OO!!

 

Na Baraka Mpenja , Dar es salaam

BENCHI la ufundi la wakata miwa wa Kaitaba, wana Nkulukumbi Kagera Sugar limesema kikosi chake kwa kiasi kikubwa kinakidhi mahitaji yao, ingawa wana mpango wa kuongeza nyota wachache hasa sehemu ya ulinzi na kiungo.

Kocha msaidizi wa klabu hiyo, Murage Kabange amesema wachezaji watakaoongezwa ni wa hapa hapa Tanzania.

“Ukiangalia kikosi chetu, tumesajili wachezaji 24 tu, na kati yao wawili ni kutoka Uganda, hatuna sababu ya kuongeza wachezaji kutoka nje, tunataka wachezaji wa Tanzania”. Alisema Kabange.

Kabange ameongeza kuwa kilichowaathiri mzunguko wa kwanza ni wachezaji kutoelewana kwani kulitokea mabadiliko kwani kuna wachezaji wao waliondoka na walisajiliwa wapya, lakini mzunguko wa pili watarudisha makali yao.

“Mzunguko wa pili tutarudi na kasi kubwa kama msimu uliopita, kikosi ni kilekile, malengo yetu na kushika nafasi za juu. Tumeshagundua mapungufu yetu, tulichelewa kuanza matayarisho, wachezaji wa zamani walibaki 14, tuliongeza wapya karibu 10, na tulichelewa kuanza kuunganisha kikosi”. Alisema Kabange.

Kocha huyo msaidizi aliwataka mashabiki wa soka mkoani Kagera kuwapa sapoti kubwa kwani timu yao inajipanga kuwapa raha kubwa mzunguko wa pili wa ligi kuu Soka Tanzania bara.