WABURUZA MKIA ASHANTI UNITED KESHO KUWASAKAMA PRISONS CHAMAZI, WATAMBIANA KUUANA KWA AJILI YA POINTI 3 MUHIMU!!

Kikosi cha Prisons

Na Baraka Mpenja, Dar es salaam

LIGI kuu soka Tanzania bara inatarajiwa kuendelea kesho katika dimba la Azam Complex,  Mbande, Chamazi, nje kidogo ya jiji la Dar es salaam baina ya timu mbili zinazochuana  nafasi za mwisho katika msimamo, Ashanti United `Watoto wa jiji` dhidi ya maafande wa magereza waliojeruhiwa na Mnyama Simba wiki iliyoipta, Tanzania Prisons `Wajelajela` kutoka jijini Mbeya.

Katibu mkuu wa Prisons, Inspekta, Sadick Jumbe ameuambia mtandao wa MATUKIO DUNIANI kuwa maandalizi ya mechi hiyo yamekamilika ambapo kocha mkuu Jumanne Chale akisaidiwa na Osward Morris wamefanya marekebisho ya makosa yaliyowagharimu jumamosi ya wiki iliyopita na kufungwa bao 1-0 na vinara wa ligi hiyo wenye pointi 18 kibindoni, Wekundu wa msimbazi Simba Sc.

“Mechi dhidi ya Simba tulikuwa na uwezo wa kushinda, lakini wachezaji wetu hasa safu ya ushambuliaji walikosa nafasi kadhaa za wazi, hivyo mwalimu Chale amekazania zaidi eneo hili la umaliziaji na kwa asilimia kuwa kazi imekamilika na kinachosubiriwa ni mechi ya kesho dhidi ya Vipofu waliiona mwezi baada ya kuibamiza Coastal union 2-1, ndugu zetu Ashanti United”. Alisema Jumbe.

Wanandinga wa Ashanti wakipiga jalamba

Jumbe alisema wachezaji wote wapo salama na Fredy Chudu ambaye alikuwa majeruhi,  naye yupo tayari kutumika kesho, hivyo mashabiki wakae mkao wa kupokea ushindi katika kipute hicho.

Hata hivyo Jumbe amekiri wazi kuwa tatizo kubwa la kikosi chao ni safu ya ushambulaiji ambayo inashindwa kufumania nyavu, lakini amesema kocha Chale anakifua vilivyo na wanatarajia matokeo mazuri kuanzia mechi ya kesho na mechi zajazo ikiwemo ile ya mahasimu wao wa jadi, Mbeya City katika dimba la Sokoine jijini Mbeya siku zijazo.

“Soka ni mchezo wa makosa, kesho tunashuka dimbani, tumejiandaa kushinda, lakini chochote kinaweza kutokea. Mashabiki watuunge mkono kwa dhati kwani ligi bado sana na tuna nafasi ya kushinda”. Alisema Jumbe.

Kwa upande wao Ashanti United kupitia kwa Afsia habari wao, Marijani Rajab wamesema sasa wameamka na kazi yao ni kutafuta pointi tatu kwa kila mechi mbele yao.

“Watu wanatuona kama hatuna uwezo kabisa, kumbuka tulifanya vizuri sana ligi daraja la kwanza, wachezaji ni walewale, mechi za kwanza walikuwa na hofu kutokana na kukosa uzoefu, lakini kwasasa wameanza kuimarika na ndio maana timu angalau inapata matokeo”. Alisema Marijani.