GHANA YAPELEKA KILIO CHA 6-1 KWA MAFARAO KUWANIA KUFUZU KOMBE LA DUNIA, ASAMOAH GYAN APIGA MBILI, MUNTARI NAYE YUMO!!

 Na Baraka Mpenja kwa msaada wa Mtandao

Hakika soka lina mambo yake, jana usiku mashabiki wengi walifurika kushuhudia mechi kali ya kuwania kufuzu fainali ya kombe la Dunia mwakani nchini Brazil kwa ukanda wa Afrika baina ya timu ya Taifa ya Ghana `Black Stars` dhidi ya timu bora ya Misri `Mafarao`.

Ilikuwa mechi nzuri sana kwani wenyeji Ghana waliingia uwanjani wakionekana wanahitaji ushindi mnono ambapo dakika zote 90 walionesha soka safi na kuwadhibiti vizuri sana Misri ambao walikuwa tishio zaidi hasa wakati wa makundi kwani hawakuwahi kupoteza mechi.

Ingekuwa hivyo kwa timu yoyote kujiandaa na kushindani zaidi kama ingekutana na waarabu hao wanaocheza soka la Uhakika, lakini jana walitota vibaya sana mbele ya Ghana waliosheheni majembe yao muhimu na kulala kwa idadi kubwa ya mabao 6-1.

Mshambuliaji Asamoah Gyan alifunga mabao mawili dakika ya tano na 52, wakati Wael Gomaa alijifunga dakika ya 21.

Mohamed Aboutrika aliifungia bao pekee Misri kwa penalti dakika ya 41, kabla ya Majeed Waris kuifungia Ghana dakika ya 44, Sulley Muntari akafunga kwa penalti dakika ya 72 na mchezaji mpya wa Chelsea, Christian Atsu akahitimisha karamu ya mabao ya Ghana dakika ya 87.

Hatari tupu: Asamoah Gyan aliifungia Ghana mabao mawili

Kikosi cha kilikuwa; Ghana: Dauda, Inkoom, Akaminko, Sumaila, Opare, Essien, Muntari/Badu dk83, K Asamoah, A Ayew/Atsu dk83, Waris, Gyan/Wakasu dk79.

Misri: Ekrami/El Shenawy dk57, A Fathi, W Gomaa, Nagieb, Shedid/Shikibala dk46, Ashour/Mehamadi dk40, Ghaly, El Neny, Aboutrika, W Soliman na M Salah.