MTIBWA SUGAR WAANZA KUPASHA MISULI MANUNGU, WATAMBA KUWABURUZA MBEYA CITY JUMATANO LICHA YA KUMWAGIWA SIFA NYINGI!!

 

Na Baraka Mpenja , Dar es salaam

MABINGWA wa zamani wa ligi kuu nchini Tanzania, Wana TamTam, Mtibwa Sugar tayari wameshaanza mawindo yao huko Mashamba ya miwa ya Manungu Turiani Mkoani Morogoro dhidi ya klabu mpya ya Mbeya City keshokutwa uwanja wa Manungu Complex.

Akiongea kwa njia ya simu jioni hii na mtandao wa MATUKIO DUNIANI, Meneja wa klabu hiyo, David Bugoya amesema baada ya mchezo wa jumamosi ya wiki iliyopita ambao walipoteza kwa kutunguliwa mabao 2-0 na Mnyama Simba, kikosi kamili kimerejea jana Manungu na kuanza mazoezi.

Bugoya amesema ligi bado ni mbichi, hivyo wanazidi kujipanga na kuhakikisha wanafuta makosa yaliyojitokeza katika mechi za nyuma na kuangalia zaidi mbele.

“Siku zote kocha wetu, Mecky Mexime amekuwa akitamka kuwa soka ni mchezo wa makosa, wachezaji wake walifanya makosa mbele ya Simba  na kuadhibiwa, lakini kwa sasa timu inaendelea na mazoezi hapa Manungu, na ninavyokuambia muda huu kaka, nipo mazoezini kuwawinda Mbeya City”. Alisema Bugoya.

Hata hivyo Bugoya amesema kwa mujibu wa mashuhuda waliokuwepo katika mchezo wa Mbeya City dhidi ya Yanga uwanja wa Sokoine jijini Mbeya, wameeleza kuwa klabu hiyo inacheza soka safi na kuonesha kuwa wako hai kwa hali ya juu.

“Nasikia vijana hawa ni wazuri sana na waliwabana sana Yanga, lakini soka ni mchezo wa mahesabu, chochote kinaweza kutokea. Sisi tunaendelea vizuri na mazoezi yetu na wachezaji wana morali kubwa sana kwani wanajua ligi bado ni mbichi sana”. Alisisitiza Bugoya.

Mpaka sasa Mtibwa wamejikusanyia pointi 4 kibindoni na wapo nafasi ya 8 katika msimamo wa ligi kuu soka Tanzania bara, wakati Mbeya City wapo nafasi ya 7 wakijikusania pointi 5.

Wakati watengeneza sukari hao wa Manungu wakiendelea na jalamba, nao wakali wa ,Mbeya na kipenzi cha mashabiki mkoani humo, klabu ya Mbeya City inatarajia kuwasili leo mkoani Morogoro tayari kwa mchezo huo ambao ni wa kwanza kwao kucheza nje ya uwanja wao wa Sokoine.