MBEYA CITY WAKO FITI NYUMBANI, UGENINI, WAWAPIGIA HESABU KALI WANA TAMTAM JUMATANO MANUNGU!!

 

Na Baraka Mpenja , Dar es salaam

KLABU ya soka ya Mbeya City ya jijini Mbeya imesema malengo yake ni kufanya vizuri msimu huu licha ya kuwa msimu wa kwanza kwao kucheza michuano ya ligi kuu soka Tanzania bara .

Akizungumza na mtandao wa FULLSHANGWE kocha mkuu wa klabu hiyo, Juma Mwambusi “Ferguson wa Mbeya” amesema kuwa wameanza mechi tatu wakiwa nyumbani, wakishinda moja na kutoa sare mbili, lakini wamejipanga kucheza mechi zote kwa kiwango cha juu sana bila kujali wako wapi.

“Tumeanza nyumbani mechi zote tatu, lakini hili sio tatizo kwetu, tunajua kuwa lazima timu icheze nyumbani na ugenini, tumejiandaa kwa mechi zote na tunaanza kibarua na Mtibwa wakiwa kwao, maandalizi yanakwenda vizuri na hivi tuko njiani kuelekea Morogoro tayari kwa kazi moja ya kusaka ushindi”. Alisema Mwambusi.

Mwambusi alisema timu yake imecheza mechi ngumu sana mwanzoni na kadri muda unavyozidi kwenda kikosi chake kinaimarika na kucheza kitimu zaidi.

“Vijana wangu wanashika maelekezo kwa haraka, najivunia hilo, kwasasa tatizo kubwa ni ubutu wa safu ya ushambuliaji, kabla ya mchezo wa jumatano na Mtibwa Sugar nitakuwa nimefanyia kazi tatizo hilo na nina matumaini ya kufanya vizuri”. Alisema Mwambusi.

Kocha huyo kipenzi kwa wana Mbeya aliweka wazi kufurahishwa na hamasa kubwa ya mashabiki wa soka mkoani Mbeya kwa kujitokeza kwa wingi kuishangilia timu yao na kuwapa moyo wachezaji wake ambapo katika mchezo wa jumamosi kitita cha shilingi milioni 100 kilipatikana na kuvunja rekondi ya mechi ya Yanga na Prisons mwaka jana.

“Mashabiki ni mchezaji wa 12, hakika niwazi kuwa Mbeya City ni timu ya wananchi, mashabiki wamekuwa wakiwapa nguvu sana wachezaji wangu, naamini tutafika mbali na kutimiza malengo yetu kirahisi”. Alisema Mwambusi.

Mbeya City ilianza ligi kuu kwa kucheza dhidi ya Kagera Sugar na kutoka suluhu ya bila kufungana, mchezo wa pili walicheza na Ruvu Shooting na kuibuka na ushindi wa mabao 2-1 na mwishoni mwa wiki walishuka dimbani kukabiliana na mabingwa wa ligi hiyo, Yanga SC na kutoka sare ya 1-1.

Mpaka sasa Mbeya City wamejikusanyia pointi 5 kibindoni na wapo nafasi ya saba katika msimamo wa ligi kuu, huku JKT Ruvu wakiwa kileleni na mzigo wa pointi 9, wakifuatiwa na Simba SC wenye pointi saba.

Yanga bado wapo Mbeya wakijiandaa na mchezo mwingine wa ligi kuu jumatano ya wiki hii dhidi ya vibonde, Tanzania Prisons.