Kocha wa Coastal Union, Hemed Morocco
Na Baraka Mpenja
Wagosi wa kaya wanaendelea kujifua katika dimba la CCM Mkwakwani jijini Tanga kuelekea msimu mpya wa ligi kuu soka Tanzania bara unaorajia kuanza kushika kasi Agosti 24 mwaka huu huku malengo yao yakiwa ni kutwaa ubingwa.
Akizungumza mchana huu na mtandao wa MATUKIO DUNIANI kwa njia ya simu kutoka Tanga, Kocha mkuu wa klabu hiyo, Mzanzibar, Hemed Morocco amesema kikosi chake kinaendelea kuimarika kadri siku zinavyozidi kuyoyoma, huku akiwasifu wachezaji wake kushika haraka maelekezo yake.
“Tumesajili wachezaji wapya, lakini wapo wa zamani, najisikia vizuri sana kuona wachezaji wangu wanaelewa kwa haraka kile ninachohitaji mimi. Ingawa bado ni mapema sana na siwezi kuahidi makubwa, lakini kikosi changu kinatia matumaini na kunipa cha kuzungumza”. Alisema Morocco.
Morocco alisema baada ya kucheza mechi za kirafiki ikiwemo ile ya Simba ambayo walishinda kwa bao 1-0 uwanja wa Mkwakwani, amebaini baadhi ya makosa na hivi sasa anajitahidi kuyafuta kwa kiasi kikubwa hususani safu ya ushambuliaji.
“Toka msimu uliopita, safu yangu ya ushambuliaji haikuwa nzuri sana, lakini hili ni tatizo la taifa zima, ni ukweli usiofichika kuwa timu nyingi zina matatizo ya ushambuliaji, ila ninajitahidi sana angalau kunoa safu yangu ili iwe na makali kabla ya kuanza ligi kuu”. Alisema Morroco.
Kocho huyo anayesifika kufundisha soka safi, aliwasifu wachezaji wake wapya Kenneth Masumbuko, Juma Nyoso, Haruna Moshi “Boban”, Crispin Odula kwa uwezo mkubwa waouonesha wakiwa uwanjani.
“Hakika vijana hawa ni faraja kubwa kwangu, kila kukicha wanacheza mpira mzuri mno, naamini nitafanikiwa ndoto zangu. Ila kwa mashabiki wetu, nawasihi wasiwe na haraka, bado ni mapema, lakini nahitaji ushirikiano kutoka kwao”. Alisema Morroco.
Wagosi wa Kaya wataanza kampeni ya kutafuta ubingwa wa ligi kuu soka Tanzania bara Agosti 24 ambapo wataanzia ugenini dhidi ya JKT Oljoro katika dimba la Sh. Amri Abeid Kaluta mjini Arusha.
0 comments:
Post a Comment