“DEL PIERO” AULA KLABU YA SOKA YA NJOMBE MJI, ATAMBA KUTIMIZA NDOTO ZAO, LAKINI AHITAJI USHIRIKIANO MKUBWA!!

John Wiliam “Del Piero”

Na Baraka Mpenja wa Fullshangwe Dar es salaam

Kocha mpya wa klabu ya Njombe mji ya mkoani Njombe, John Wiliam “Del Piero” amekiri kufurahishwa na mapokezi makubwa aliyoyapata  katika klabu yake mpya , huku viongozi na mashabiki  wakiwa na matumaini makubwa ya kutimiziwa ndoto zao za kufika mbali kisoka.

Piero ambaye ni mjumbe wa kamati ya ufundi ya wekundu wa Msimbazi Simba, alisema kuwa hiyo ni changamoto mpya  kwake, lakini hana wasiwasi kwani ana uzoefu wa kufundisha timu kama hizo na alifanya hivyo katika klabu ya  Africans Sports ya Tanga, na Lindi.

Kocha huyo aliongeza kuwa baada ya kufika huko ameweka wazi kwa viongozi wake kuwa yeye ni muumini wa soka la vijana, hivyo lazima wazingatie na kuheshimu falsafa yake ya soka la vijana na wakifanya hivyo atafanya kazi kwa ufanisi zaidi.

“Kikubwa nimewaambia nataka vijana, lakini mimi sio malaika, nahitaji sapoti kutoka kwao, umoja ni nguvu, utengano ni udhaifu”. Alisema Piero.

Piero alisema jana alihudhuria mazoezi ya klabu yake mpya na kuona baadhi ya vijana na kuwaambia viongozi wake kuwa anawahitaji vijana hao na akikaa nao kwa miezi miwili wataonesha kile anachohitaji.

“Nilifika mazoezini, kuna vijana wanaweza sana ingawa wanakosa mafundisho ya kiutalaamu, ila nikikaa nao lazima watishe vibaya sana, lakini kama nilivyosema awali nahitaji ushirikiano na heshima nikiwa kocha niliyekaa darasani na kusomea soka”. Alisema Piero.

Kocha huyo sasa atakuwa mpinzani wa Shadrack John Nsajigwa Mwandemele ambaye amekabidhiwa klabu ya Lipuli ya mkaoni Iringa, hivyo watakutana na kuoenesha ujanja wa soka.