MTIBWA SUGAR: KUMPOTEZA JAVU SIO TATIZO KWETU, KINDA JUMA LUIZIO MRITHI WAKE, HUYU DOGO NI HATARI MNO!!

Hussein Javu pichani nafasi yake kachukua Luizio

Na Baraka Mpenja 

Wakata miwa wa mashamba ya miwa ya Turiani mkoani Morogoro, klabu ya wana Tamtam  Mtibwa Sugar  wamesema kumpoteza Hussein Javu ambaye amesajiliwa na mabingwa wa ligi kuu Tanzania bara, Dar Young Africans, sio tatizo kubwa kwao kwani kinda wao Juma Luizio ambaye anaicheza timu ya taifa “Taifa Stars” anawatosha sana.

Meneja wa klabu hiyo, David Bugoya ameiambia MATUKIO DUNAINI kuwa Javu  alikuwa nguzo ya ushambuliajia ya kikosi chao, lakini mpira ni kazi yake na anajali maslahi yake, hivyo hawakuona sababu ya kumbania kujiunga na Yanga waliokuwa wanamhitaji kwa muda mrefu.

“Tumempoteza Javu , lakini tuna kijana wetu ambaye tumempandisha kutoka kikosi cha umri chini ya miaka 20, Juma Luizio, ni bonge la mshambuliaji ndugu yangu na ndio maana kocha wa Taifa stars amemjumuisha katika majukumu ya kuitumikia timu ya taifa. Hatuna shaka tutamtumia na atazoe a kucheza mechi kubwa”. Alisema Bugoya.

Bugoya alisisitiza kuwa Mtibwa huwa haina presha ya kufanya usajili kwani siku zote inatengeneza wachezaji mahiri ambao huwaniwa na klabu kubwa za hapa nchini, Simba na Yanga.

“Sisi tuna falsafa ya kujenga soka la vijana, na ndio maana utaona timu nyingi zinahangaika kusajili, lakini sisi tunakaa kimya na kuwa na subira, huwa tunaamini vijana wetu wana uwezo mkubwa sana. Msimu ujao bwana mdogo Luizio ndio chaguo letu kuongoza safu ya ushambuliaji.” Aliongeza Bugoya.

Akizungumzia malengo yao, Bugoya alisema kocha wao Mecky Mexime anaendelea na program ya mazoezi jijini Dar salaam na ana mipango ya kutwaa ubingwa msimu ujao.

Bugoya alisema Mtibwa ni timu bora sana hapa nchini, na msimu ujao wanataka kuwaonesha mashabiki wa soka kuwa wana uwezo mkubwa zaidi ya kucheza mpira na kama watapewa uzima basi watawapokonya Yanga taji walilotwaa msimu uliopita.