JULIO: BOBAN NA NYOSO NI HATARI SANA, MECHI YA LEO NA WAGOSI WA KAYA ITAKUWA BALAA NA KIPIMO SAHIHI KWA SIMBA!!

Na Baraka Mpenja

Wekundu wa Msimbazi Simba, “Taifa kubwa”  chini ya kocha Abdallah Kibaden “King Mputa”  leo hii majira ya saa 10 jioni wataoneshana ufundi dhidi ya wagosi wa Kaya, wagosi wa ndima, Coastal Union wanaofundishwa na kocha Mzanzibar, Hemed Morocco , katika mechi ya kirafiki itakayochezwa uwanja wa CCM Mkwakwani jijini Tanga.

Wakati saa chache zikiwa zimesalia kuanza kwa kipute hicho, Simba wametoa sababu ya kuwafuata Wagosi wa kaya, Coastal union kuwa ni ubora wa kikosi chao, hivyo itakuwa kipimo sahihi kuangalia uwezo wa wachezaji wao.

Akizungumza na FULLSHANGWE kutoka Tanga, kocha msaidizi wa klabu ya Simba, Jamhuri Kiwhelu “Julio Alberto” amesema wamepata hamasa ya kuwafuata wapinzani wao kwani wanajua kucheza soka na wana wachezaji wazuri wakiwemo Haruna Moshi “Boban”, Juma Nyoso, Dany Lyanga, Chrispin Odula, shaban Kado na wengine wengi waliowasajili.

“Kwanza lazima ukubali kuwa Coastal ni timu nzuri, ina wachezaji wazuri sana, Haruna Moshi, Juma Nyoso na wengine, ukiangalia aina hiyo ya wachezaji utagundua kuwa kujipima nao ni sahihi sana. Mimi nikiwa kocha msaidizi wa kocha Abdallah Kibadeni tumeona mechi ya leo itakuwa nzuri kupima kikosi chetu na ndio maana tumesafiri mpaka huku”. Alisema Julio.

Kocha Msaidizi wa Simba, Jamhuri Kiwhelo “Julio” amekiri wazi kuwa Wagosi wa Kaya wana kikosi kizuri na wachezaji wakali.

Julio amewataja wachezaji wao wa zamani Haruna Moshi “Boban”  (pichani juu) na Juma Nyoso (pichani chini) kuwa leo hii watakuwa kivutio kikubwa kwani wana uwezo mkubwa sana wa kucheza kandanda
Julio aliongeza kuwa akiangalia duniani kote kwa sasa kIla timu inacheza mechi za kirafiki kujiandaa na msimu ujao wa ligi kuu, hivyo Simba wana mipango mizuri ya kutwaa ubingwa na ndio maana wanazunguka maeneo tofauti kupima uwezo kikosi chao.

“Timu zilizoendelea kama Manchester United, Barcelona, Arsenal, Chelsea,  sasa hivi zinacheza mechi za kirafiki, nasi kwa kufuata nyayo zao  ndio maana tumefika huku Tanga.  Asubuhi hii tunanyoosha misuli kuondoa uchovu na panapo majaaliwa tutacheza mechi ya leo jioni”. Alisema Julio.

Kocha huyo alisema baada ya mechi ya leo jioni, kesho jumatatu wataanza safari ya kurejea jijini Dar es salaam kuendelea na mazoezi ya kujiwinda na ligi kuu soka Tanzania bara ambayo itaanza kushika kasi Agosti 24.