ZAMUNDA ASEMA HAKUNA UTANI HATA KIDOGO, WANATAKA KOCHA WA KIGENI KUWARUDISHA LIGI KUU!!

 

Na Baraka Mpenja

Baada ya kushuka daraja msimu uliopita, Klabu ya Africa Lyon ya jijini Dar es salaam imeanza programu ya kutafuta wachezaji wapya kwa ajili ya msimu ujao wa ligi daraja la kwanza.

Mmiliki wa klabu hiyo Rahim Rangezi Zamunda amezungumza na MATUKIO DUNIANI na kusema kuwa malengo yao ni kuirejesha timu ligi kuu, hivyo wamewaita wachezaji mbalimbali ili wajaribu bahati yao, na kwa yeyote atakayefaa basi watamsajili.

“Sisi tunajipanga vizuri, kila kitu kinaenda sawa, na leo hii tumefanya mazoezi na vijana wapya, tutapata wazuri na kuwasajili kwa ajili ya ligi daraja la kwanza”. Alisema Zamunda.

Zamunda aliongeza kuwa kwa sasa wanahitaji kupata kocha mpya wa kigeni ili aimarishe kikosi chao, lakini mipango yao iko pole pole kwani hawaitaji haraka.

“Watu wanachanganya, Charles Otieno hakuwa kocha wetu kwa muda ule, yeye ni mkurugenzi wa ufundi wa klabu, kwa sasa yupo nchini Kenya kwa mapumziko, tunahitaji kocha wa kufanya kazi nasisi, na Mkenya huyo atabaki kuwa mkurugenzi wa ufundi”. Alisema Zamunda.

Mmiliki huyo alisema wachezaji wote waliokuwepo klabuni hapo kwa Mkopo, ni mmoja tu, Ibrahim Job ambaye ameombwa kubakia ili awape msaada.

Katika hatua nyingine Zamunda alisema wachezaji wao wengi wataendelea kuitumikia klabu katika kipindi hiki cha mapambano na uhakika wa maslahi upo.

“Nimejiandaa vizuri kuwalipa mishahara, posho na huduma nyingine za kibinadamu, pesa ipo, cha msingi watambue kazi yao na wajitume zaidi”. Alisema Zamunda.

Katika kikosi cha klabu hiyo Zamunda alisema wanahitaji zaidi wachezaji wa safu ya ushambuliaji ambayo ilikuwa butu sana, halafu wanataka kusajili walinzi wa ukweli ili kuweka mambo safi ligi daraja la kwanza msimu ujao.