SUNZU AKALIA KUTI LA MOTO MSIMBAZI, WAMTOSA KWEUPE!!

 

UWEZEKANO wa mshambuliaji wa kimataifa wa Zambia, Felix Sunzu kuendelea kuichezea Simba ni finyu baada ya benchi la ufundi kusema halimuhitaji.

Sunzu aliyetua Msimbazi Julai 2011, akitokea El Hilal ya Sudan baada ya kung’ara kwenye michuano ya Chalenji, hatima yake imekuwa ikitiliwa shaka kutokana na kiwango chake licha ya kulipwa mamilioni ya fedha.

Hata hivyo, uongozi uliendelea kumvumilia nyota huyo wakihofia gharama za kukatisha mkataba wake, hadi ulipomalizika baada ya kwisha kwa ligi Kuu Tanzania bara, Mei 18.

Habari kutoka ndani ya Simba zinaeleza kwa sasa nyota huyo hayupo kwenye mipango ya klabu hiyo kwa msimu ujao, lakini anaweza kuongezewa mkataba kama mipango ya kumsajili Mganda Moses Oloya itashindikana.

Chanzo cha uhakika kutoka ndani ya Simba kimedokeza uwezekano wa Sunzu kuongezewa mkataba upo mikononi mwa benchi la ufundi chini ya Kocha Mkuu Abdallah ‘King’ Kibadeni na msaidizi wake Jamhuri Kihwelo ‘Julio’.

“Ni kweli Sunzu amemaliza mkataba wake, lakini jukumu la kuendelea kuichezea Simba au kuachana naye lipo mikononi mwa makocha, hivyo waulizwe wao kwanza,” kilisema chanzo hicho.

Alipoulizwa Julio kuhusu nyota huyo, alisema kwa aina ya wachezaji waliopo kwenye kikosi chao, Sunzu hana nafasi kwa sababu namba anayocheza tayari ina wazuri zaidi yake.

Julio aliyewahi kuichezea Simba na Taifa Stars, alisema kwa sasa kikosi chao kimekamilika kila idara, ndiyo maana Sunzu hana nafasi kwani imeshazibwa na wengine.

Mbali ya Julio, hata Kibadeni mara kadhaa amekuwa akisema hatamsajili mchezaji wa kigeni hadi awe na uwezo wa ziada dimbani ambao nyota wazalendo hawana.

Sunzu aliyezaliwa Februari 5, 1989 katika kitongoji cha Chingola, Zambia kabla ya kutua Simba alichezea timu za Konkola Blades, Marsa, Châteauroux na El Hilal, pia ameichezea timu ya taifa ya Zambia mara 14 na kuifungia mabao nane.

CHANZO TANZANIA DAIMA