SIMBA, YANGA ZACHOMEWA NYUMBA, TABIA YAO YA KUBANIA WACHEZAJI YAPONDWA VIKALI!!

Imewekwa June 24, 2013 saa 12:02 mchana 

 

Shomary Kapombe (juu pichani) na Edward Christopher (Chini pichani) ni zao la Morogoro Youth Soccer Academy, kwa vipaji vyao hawatakiwi kuishia Simba

 

Moja kati ya walinzi bora wa pembeni wa klabu ya Yanga kwa sasa ni bwana mdogo Juma Abdul(kushoto) ambaye ametokea kituo cha Morogoro

Na Baraka Mpenja wa Fullshangwe Dar es salaam

Klabu kongwe za kandanda nchini Tanzania, wekundu wa msimbazi, Simba na Dar Young Africans “ Kwalalumpa Malysia” zimeshauriwa kuachana na kasumba ya kuwabania wachezaji wao kwenda kucheza soka la kimataifa kwani kama nao wangefanyiwa hivyo wasingesajili kwa mbwembwe kubwa.

Akizungumza na mtandao wa kazi wa FULLSHANGWE mkurugenzi mkuu wa kituo cha kulea na kukuza vipaji kwa vijana wadogo cha mkoani Morogoro, (Morogoro Youth Soccer Academy), Rajab Kindagule amesema kuwa vituo vya soka kama kilivyo chake hujitahidi kuzalisha wachezaji wenye vipaji vya hali ya juu, lakini wanapoenda katika klabu za ligi kuu hususani Simba na Yanga wanaharibikiwa maisha yao ya soka na kubaniwa kwenda kucheza nje ya nchi.

Kindagule amesisitiza kuwa kituo chake ni kitalu cha kuzalisha wachezaji huku akiwataja baadhi ya wachezaji wanaofanya vizuri kama Kiraka Shomary Kapombe na Edward Cristopher wanaocheza Simba, pia beki wa kulia wa Yanga Juma Abdul kuwa ni zao la kituo hicho pamoja na wengine wengi wanaocheza ligi ligi kuu na daraja la kwanza.

“Kapombe ni zao langu, nimesikia kwenye vyombo vya habari kuwa kijana anatakiwa kwenda Uholanzi kufanya majaribio, chonde chonde Simba wasifanye mchezo na kumbania bwana mdogo, wamuache aende kucheza huko na anaweza kupata nafasi ya kwenda ligi kubwa zaidi”. Alisema Kindagule.

Mkurugenzo huyo alisema iwe mwiko kwa wachezaji wanaotoka vituoni kuishia Simba na Yanga, bali wanatakiwa kuendelezwa zaidi mpaka medani ya kimataifa ili timu ya taifa ipate wachezaji mahiri zaidi mfano wa Samata na Ulimwengu.

“Sisi tumeshakubaliana na wakala anayetaka kumpeleka Kapombe Uholanzi kuwa anataka kujenga ushirikiano na kituo changu, ni nafasi nzuri sana kwa wachezaji kwa sababu watakuwa wanapelekwa nchini humo kwa majaribio, lakini lazima timu zetu zibadilike jamani”.

Kindagule alisema kituo chake kinachukua vijana wadogo wa umri chini ya miaka 12 kitu ambacho kinawatofautisha na vituo vingine, hivyo juhudi kubwa wanazotumia kuwaendeleza vijana zinapaswa kuendelezwa na timu zinazowachukua vijana hao.

Pia mdau huyo na kiongozi wa soka la vijana amekiri kuwa mipira waliyopewa na rais wa shirikisho la soka Tanzania, injinia Leodigar Chilla Tenga amewasaidia sana kuendeleza kituo na sasa mambo yanakwenda vizuri.

“Kama TFF wana uwezo, kila mwaka watusaidie kama alivyofanya Tenga, itatusaidia kufika mbali zaidi”. Alisema Kindagule.

Kindagule aliongeza kuwa kwa sasa amesikia Rais wa Jamhuri ya Muungano waTanzania,  DKT.Jakaya Kikwete ana mpango wa kuanzisha Academy ya soka nchini, lakini ametoa wito kwa Rais kutafuta watu makini kama akina Kanali Idd Kipingu wenye dhati ya kuendeleza soka kuliko kuwapa wahuni.

“Tunahitaji watu wenye nia ya dhati na moyo, wazalendo ili tuweze kufika mbali, kama kutakuwa na wachumia matumbo, haina maana sasa”. Alisema Kindagule.