POLISI MOROGORO MWENDO MDUNDO, WAPIGA JALAMBA LA NGUVU, KESHO KUJIPIMA UBAVU NA MNYAMA JAMHURI!!

Na Baraka Mpenja

Katika harakati za kuhakikisha wanarejea kucheza ligi kuu soka Tanzania bara msimu wa 2014/2015, wapiga kwata wa Polisi Morogoro wanaendelea na zoezi la kusaka wachezaji wapya kwa ajili ya kuziba nafasi zilizoachwa wazi kufuatia wachezaji kadhaa kuihama klabu hiyo na wengine kumaliza mikataba yao.

Akizungumza na MATUKIO DUNIANI kutoka Morogoro, Afisa habari wa Polisi Moro, Clemence Banzo amesema kuwa klabu hiyo inaendelea na mazoezi ya kusaka vipaji vipya ambapo wachezaji kutoka maeneo mbalimbali wameitwa kufanya usaili na watakaoonekana wanafaa watasajiliwa ili kuungana na wenzao wakongwe.

“Muda si mrefu tumetoka mazoezini, unajua kushuka daraja kumetupotezea ari sana, lakini kwa kujua kuwa tunahitaji kurudi ligi kuu ndani ya mwaka mmoja tumeanza kuziba nafasi zilizowazi kwa kuwafanyia usaili wachezaji wapya, naamini tutafanya vizuri”. Alisema Banzo.

Afisa habari huyo alisisitiza kuwa kwa kutambua umuhimu wa kocha wao Rishard Adolf aliyerithi mikoba ya kocha John Simkoko kipindi cha mzunguko wa pili wa ligi kuu msimu uliopita na kupata pointi 21, uongozi wa klabu umeamua kumpa mkataba wa miaka miwili ili airudishe ligi kuu.

“Adolf ni mwalimu mzuri, alitusaidia sana ingawa tulishuka daraja, tumempa mkataba mwingine, tunaamini ndani ya mwaka mmoja tunarejea ligi kuu bara”. Alisema Banzo.

Banzo aliongeza kuwa katika mazoezi hayo, kikubwa ambacho Adolf anakihitaji ni wachezaji kucheza kwa kujituma na kutambua kuwa soka ni ajira yao.

Aidha afisa habari huyo alisisitiza kuwa Adolf ni mtu anayependa nidhamu kwa wachezaji na amewataka kucheza soka kwa kuisaidia timu hiyo.

“Mazoezi yamenoga sana na mwalimu wetu anatupa matumaini makubwa sana”. Alisema Banzo.

Pia Banzo alisema hapo kesho kama mambo yatakwenda vizuri, wanatarajia kucheza mechi ya kirafiiki dhidi ya wekundu wa Msimbazi Simba katika dimba la Jamhuri mkoani Morogoro.

“Tunawasiliana na Simba ili tupate mechi ya kirafiki na kupima uwezo kikosi chetu, tuombe mungu ili mambo yaende sawa. Kama mipango itanyooka, basi Mnyama atakuwepo hapa Morogoro kesho”. Alisema Banzo.