MOROCCO: WAGOSI WA KAYA SAFARI HII NI MOTO WA KUOTEA MBALI, AWATETEA BOBAN, NYOSO NA MAFTAH!!

 

Na Baraka Mpenja

Kocha wa wagosi wa kaya wagosi wa ndima wa jijini Tanga “waja leo waondoka leo” Coastal Union, Hemed Morroco ametamba kufanya vizuri msimu ujao wa ligi kuu Tanzania bara, huku akisema tuhuma za utovu wa nidhamu dhidi ya Haruna Moshi ‘Boban’, Juma Nyosso na Amir Maftah, haziwazuii kuwasajili kwenye kikosi chao kwa msimu ujao.

Morocco amesema watafanya maandalizi ya nguvu ili kuleta ushindani mkubwa zaidi katika Ligi Kuu iliyopangwa kuanza kutimua vumbi Agosti 24.

“Tunaanza mazoezi mapema mwezi ujao, nina imani nitaanza kwa kuyafanyia marekebisho baadhi ya makosa ambayo yalijitokeza msimu uliopita japokuwa nina nyota wapya katika kikosi changu,” alisema Morroco.

Akisisitiza suala la utovu wa nidhamu kwa wachezaji Bobab, Nyoso na Maftah, Morroco alisema hilo halimpi shida kwa sababu kwanza anataka kujionea mwenyewe utovu huo wa nidhamu na zaidi ya hapo, kila kocha ana falsafa zake kiufundishaji, hivyo atajitahidi kwenda nao vizuri kwani ni nyota wenye uwezo mkubwa.

Morroco alisema utovu wa nidhamu ni suala pana, hivyo licha ya kuwepo kwa tuhuma hizo dhidi yao, haoni kama ni sababu ya kutowasajili.

“Kila kocha ana falsafa yake, siwezi kumsemea Liewig, nataka nijionee mwenyewe utovu wao wa nidhamu, sio kuwaacha tu kwa kusikia kwa watu,” alisema Morroco na kuongeza anaamini watakuwa wachezaji wazuri.

Pia kocha huyo aliyeiongoza klabu hiyo msimu uliopita na kumaliza katika nafasi ya sita, aliongeza kuwa mashabiki wa kandanda mkoani Tanga wasiwe na shaka kwani kikosi chake kimesheheni majembe ya ukweli.

“Ni wachezaji bora sana, nataka kushindana na kuzipiku klabu zilizokuwa juu yetu msimu uliopita, mazoezi yatakuwa maalumu kujiandaa kutwaa ubingwa wa ligi kuu, kikubwa mashabiki watupe sapoti kubwa”. Alisema Morocco.