MBEYA CITY KUSHIRIKI KOMBE LA MUUNGANO MUFINDI MKOANI IRINGA, KUANZA KUTUPA KARATA JUNI 30!!

 

Na Baraka Mpenja

Kikosi cha pili cha klabu mpya ya ligi kuu soka Tanzania bara, Mbeya City ya jijini Mbeya kinatarajia kushiriki michuano ya Kombe la Muungano litakalofanyika Mufindi kijiji cha Igolole mkoani Iringa.

Kocha msaidizi wa kikosi hicho kinachonolewa na mwalimu Juma Mwambusi, Mwalimu Maka Mwalwisyi  ameimbia MATUKIO DUNIANI kuwa wataanza kutupa karata yao ya kwanza mnamo juni 30 mwaka huu.

“Mwaka huu tumechelewa sana kuanza michuano hii, udhamini umeelezwa kuwa tatizo, lakini wasimamizi wametuambia kuwa mambo yanakwenda vizuri na hapo juni 30 tutaanza kampeni yetu”. Alisema Mwalwisyi.

Mwalwisyi alisema mazoezi hayo ya kikosi cha pili ni njia mojawapo inayotumiwa na benchi la ufundi kuhakikisha wanapata wachezaji wa kuwapandisha kikosi cha kwanza kitakachoshiriki ligi kuu soka Tanzania bara msimu ujao.

Kocha huyo alisema vijana wao wana morali kubwa ya kushiriki michuano ya Muungano na wameahidi kuibuka mabingwa kwa mwaka huu.

“Kizuri tunaenda sanjari na watani wetu wa jadi , Mbaspo Academy, ni wakati muafaka kwetu kujidhihirishia ufalme wa soka nyanda za juu kusini, tunajipanga vizuri sana kuhakikisha tunafanya vizuri sana”. Alisema Mwalwisyi.

Kuhusiana na kikosi cha kwanza kuanza mazoezi kwa ajili ya ligi kuu, kocha huyo alisema taratibu zote zimekamilika, wanasubiri tu uongozi useme kuhusu hilo na wao benchi la ufundi waanze kupiga mazoezi ya kufa mtu.

Mwalwisyi aliwataka mashabiki wa soka mkoani Mbeya kuwaunga mkono sana kipindi hiki kipya cha klabu hiyo kwani soka linachezwa uwanjani na nje ya uwanja ambao sapoti ya wadau na mashabiki inachangia sana kupata mafanikio.