MAGULI ATUMBUKIA NYAVUNI, ASAINI MKATABA WA MIAKA MIWILI RUVU SHOOTING, SUALA LA DILUNGA KUTIMKIA MSIMBAZI BADO TETE!!

Na Baraka Mpenja wa 

Mshambuliaji nyota wa maafande wa Tanzania Prisons, Elius Maguli ametimkia zake kwa wapigwa kwata wa Ruvu Shooting wa mkoani Pwani baada ya kukubali kumwaga wino na kusaini kuitumika timu hiyo kwa miaka mwili.

Afisa habari wa Ruvu Shooting Masau Bwire ameimabia MATUKIO DUNIANI Kuwa Maguli ni moja kati ya washambuliaji hatari kwa sasa kwani msimu uliopita alipachika mabao 5 kimiani na kuisaidia Prisons kusalia ligi kuu, hivyo ana uwezo mkubwa wa kuipeleka mbele klabu hiyo inaoyonolewa na kocha Charles Boniface Mkwasa “Master”.

“Maguli ni bunduki yetu sasa, tunafanya usajili makini, kocha wetu alipendekeze wasajiliwe wachezaji nane, tunaendelea kusaka vipaji vya hali ya juu, hatutaki majina makubwa bali tunataka wachezaji wenye uwezo wa kutusaidia msimu ujao”. Alisema Masau.

Masau alitamba kuwa timu nyingi zinasajili majina makubwa, wakisikia walicheza Simba na Yanga wanaona wanafaa, kumbe ni ugonjwa tu, hivyo wao wanasaka vipaji vipya kwa sasa.

Afisa habari huyo aliongeza kuwa wanataka kufanya usajili mkubwa ili msimu ujao waweze kufuta ufalme wa klabu za Simba na Yanga katika harakati za kuwania ubingwa.

“Kila mwaka Simba na Yanga, wanapokezana ubingwa kama mbio za vijiti, sisi Shooting msimu ujao tunakuwa watu wa kwanza kupindua ufalme wa timu hizi mbili. Inawezekana sana na ndio maana tunasajili vifaa vipya”. Alisema Masau.

Mbali na kuweka wazi usajili huo, afisa habari huyo hakusita kujibu tetesi zilizoenea kwamba wekundu wa Msimbazi Simba wamemsajili mshambuliaji nyota wa klabu hiyo Hassan Dilunga kwa mkataba wa miaka miwili.

Masau alisema viongozi wa klabu hiyo hawana taarifa yoyote kuhusu usajili huo na Simba hawajazungumza lolote mpaka sasa, lakini wanawasubiri kukaa meza moja kwani bado Dilunga ana mkataba wa mwaka mmoja na maafande hao.

“Dilunga ni mchezaji wetu, bado tuna mkataba naye, sidhani kama itakuwa busara kwa Simba kumsajili bila kuongea na viongozi wa Shooting, sisi tunawasubiri ili kujibu tetesi hizo”. Alisema Masau.