KING KIBADENI: CHONDE CHONDE MASHABIKI WA SIMBA KUWENI WATULIVU, TIMU HAIJENGWI KWA SIKU MOJA!!

Na Baraka Mpenja 

Kocha wa wekundu wa Msimbazi Simba mzee Abdallah Kibadeni “King Mputa” amewataka mashabiki na wanachama wa klabu hiyo kuwa wavumilivu kwa wakati huu ambao wamekubali timu isukwe upya kwa ajili ya michuano ijayo ya ligi kuu Tanzania bara.

Kibadeni ameyasema hayo katika mazoezi ya mwisho ya kubaini wachezaji wapya kwa ajili ya kuwasajili kwa ajili ya kikosi cha vijana chini ya umri wa miaka 20 pamoja na wachezaji kutoka sehemu mbalimbali kufanya majaribio yao kujaribu bahati ya kusajiliwa na Simba msimu ujao.

Wachezaji kutoka sehemu mbalimbali ndani na nje ya nchi  wapo katika mazoezi makali chini ya benchi la klabu ya simba linaloongozwa na Kibaden pamoja na Jamhuri Kihwelu, Amri Said na Selemani Matola.

“Kama wamekubali timu ijenge upya ili kurudisha heshima iliyopotea baada ya kufanya vibaya msimu uliopita na kupokonywa ubingwa na watani zetu wa jadi Yanga, kinachotakiwa kwao ni utulivu mkubwa sana na kutokuwa na haraka kwani timu haijengwi kwa siku moja”. Alisema Kibadeni.

Kocha huyo ambaye msimu uliopita alikuwa na kikosi cha wakata miwa wa Kaitaba, Kagera Sugar aliongeza kuwa kwa sasa anaandaa kikosi cha kushiriki michuano ya kombe la Kagame litakalofanyika mwezi huu nchini Sudan.

Kibadeni aliyewahi kuichezea Simba kwa mafanikio miaka ya sabini na kuifundisha kwa mafanikio makubwa alisisitiza kuwa michuano ya Kagame itakuwa kipimo tosha kwa kikosi chake kwani atawapima wachezaji wake na kama kutakuwa na mapungufu basi ataongeza nyota wengine.

“Kombe hili nitapima makali ya kikosi changu, nikigundua kuwa kina matatizo basi nitaaangalia namna ya kutafuta wachezaji wengine kwani usajili utakuwa bado haujaisha”. Alisema Kibadeni.

Tayari simba ambayo ilimaliza ligi katika nafasi ya tatu imeshasajili baadhi ya wachezaji ambao ni Zahoro Pazi, Issa Rashid, Ibrahim Twaha almaarufu kwa jina la Messi, Andrew Ntara pamoja na Moses Oloya.

Lakini imeondokewa na winga machachari anayeichezea Taifa Stars Mrisho Ngasa aliyejiunga na Yanga lakini hilo halimtetemeshi Kocha msaidizi wa Simba, bwana Kihwelu.

“Kuondoka wa Ngassa sio pengo kwetu, mpira ni kazi yake, mimi nadhani Simba ni klabu kubwa ambayo haiwezi kumbani mchezaji, muache akacheze huko, lakini sisi tuko sawa, hakuna tatizo lolote”. Alisema Kiwhelu.