KIBADENI NA WAZEE WAKE WA KAZI WAHUBIRI NIDHAMU MSIMBAZI, MTOVU WA NIDHAMU HAPATI NAFASI!!

kikosi cha Simba

Na Baraka Mpenja

Benchi la ufundi la Wekundu wa Msimbazi Simba “Taifa Kubwa” limepata jeuri kubwa baada ya kusuka wachezaji wengi makinda na kusema kuwa mwenye nidhamu mbovu kuanzia nje ya uwanja na ndani ya uwanja, kamwe hapati nafasi katika kikosi cha klabu hiyo msimu ujao wa ligi kuu Tanzania bara.

Kocha msadizi wa klabu hiyo aliyebarikiwa kuwa na maneno mengi, Jamhuri Kiwhelo “Julio” alisema kuwa kutokana na kusuka kikosi bora cha vijana, wanahitaji kuona timu hiyo inatawaliwa na nidhamu kubwa tofauti na msimu uliopita ambao Simba alikuwa na tatizo la wachezaji wake kukosa nidhamu na kutemwa na aliyekuwa kocha wa klabu hiyo Mfaransa Patrick Liewig.

Miongoni mwa wachezaji walioangukia katika rungu la kutemwa kutokana na tuhuma za utovu wa nidhamu ni pamoja na Haruna Moshi “Boban”, Ramadhan Chombo “Redondo”, Ferlix Sunzu, Mwinyi Kazimoto Mwitula, Abdallah Juma, Amir Maftah, Juma Nyoso na wengineo, na sasa baadhi ya nyota hao wengi wametemwa katika usajili.

“Safari hii hatutaweza kumvumilia mchezaji mwenye nidhamu mbovu kwani atarudisha nyuma malengo yetu ya kuwa na kikosi bora kuliko timu zote Tanzania na Afrika kwa ujumla”. Alisema Julio.

Julio aliongeza kuwa benchi la ufundi chini ya kocha mkongwe Abdallah Kibaden “King Mputa” kamwe halitafumbia macho suala la utovu wa nidhamu ili kukamilisha malengo yao ya kurejesha taji Msimbazi baada ya msimu uliopita kupokonywa na watani wao wa jadi Yanga na wao kuishia nafasi ya tatu katika msimamo.

“Simba hii lazima watu wataipenda tu, nidhamu ndio msingi katika kikosi chetu, nasisitiza tena kama mchezaji atakuwa mtovu wa nidhamu, bila kujali jina lake, katu hapati nafasi katika kikosi chetu”. Alisema Julio.

Kocha huyo ambaye alifanya kazi na Liewig msimu uliopita, aliongeza kuwa mashabiki wa klabu hiyo wanatakiwa kuwa karibu na timu ili kuwapa moyo vijana wao na kufika mbali zaidi.

“Kwanza tumshkuru Mungu hapa tulipofika, wakati tumeanza mpango wa kuijenga Simba ya vijana, watu walijua tunatania, lakini tuko vizuri na sasa tunasuka kikosi