USIONE VYAELEA VIMEUNDWA, PRISONS YAIMARIKA ZAIDI!!

Na  Baraka Mpenj, Mbeya

Leo hii mtandao wa MATUKIO DUNIANI imeshuhudia mazoezi makali  ya klabu ya Tanzania Prisons “wajela jela” katika dimba la CCM Kumbukumbu ya Sokoine jijini Mbeya chini ya kocha wake mkuu Jumanne Chale ambaye amehangaika sana msimu huu kusalia ligi kuu soka Tanzania bara na hatimaye amefanikisha ndoto yake hiyo.

Akizungumza katika mazoezi hayo, Chale amesema hakika safari yao ilikuwa ngumu sana msimu wa kwanza baada ya kuathiriwa na ajali mbaya ya gari na wachezaji wao kujeruhiwa , lakini sasa timu imeunganika upya na inacheza soka maridhawa.

“Tumefanikiwa kubakia ligi kuu msimu huu, hakika ni jambo jema sana kwetu, hii ni nafasi nzuri sana kujipanga upya msimu ujao ili kupambana kupata nafasi za juu za msimamo na kuiwakalisha Tanzania katika michuano ya kimataifa”. Alisema Chale.

Akizungumzia mchezo wa funga pazia la ligi kuu msimu huu dhidi ya Kagera Sugar chini ya kocha mkongwe kuliko wote ligi kuu kwa sasa, Abdallah Kibadeni “King Mputa”, Chale alisema mchezo huo ni mgumu sana kutokana na uimara wa wapinzania wao, lakini wanajiandaa kupata ushindi mwingine katika uwanja wa nyumbani wa Sokoine jijini hapa.

Kwa upande wake katibu mkuu wa Tanzania Prisons Sadick Jumbe alisema sasa wanaanda majeshi ya kuwatafuna wakata miwa wa kaitaba mei 18 mwaka huu na baada ya hapo watasubiri ripoti ya kocha wao ili kuifanyia kazi katika dirisha la usajili.

“Uongozi kwa kushirikiana na wadau wa soka jijini Mbeya tunajiandaa kusajili kikosi kizuri cha ushindani msimu ujao, tutazingatia mapendekezo ya mwalimu kwani yeye ndiye mtaalamu zaidi” alisema Jumbe.

Akizungumzia maendeleo ya kikosi chao, Jumbe alisema amegundua kuwa timu inapotoka daraja la kwanza na kucheza michuano ya ligi kuu, wachezaji wanahitaji muda sana kuzoea, na ndio maana walihaha sana mzunguko wa kwanza.

“Hatukuwa vizuri sana mzunguko wa kwanza, lakini sasa timu imeiva baada ya wachezaji wetu kuzoea ushindani wa ligi kuu, na tunaamini msimu ujao tutafanya vizuri zaidi”. Alisema Jumbe.

Baada ya mazoezi ya leo hii asubuhi, wachezaji wamepumzika mpaka kesho ambapo wataendelea kupasha moto misuli yao wakiwawinda Kagera Sugar.