MKONGWE KIBADENI NA MKWASA KUPIMANA UWEZO KAITABA LEO!!

 

Kocha Mkongwe kuliko wote ligi kuu soka Tanzania bara msimu huu, Abdallah Kibadeni “King Mputa” (Kulia) saa chache zijazo kuoneshana shughuli na Mkwasa wa Ruvu Shooting uwanjani Kaitaba mkoani Kagera  

Charles Boniface Mkwasa (Kushoto) atauweza utaalamu wa Kibadeni leo Kaitaba?

Na Baraka Mpenja

Leo hii dimba la kaitaba kanda ya ziwa katika mkoa wa Kagera litahimili madalagu ya wakata miwa wa Kagera Sugar dhidi ya maafande wa Ruvu shooting kutoka mkoani Pwani.

Akizungumza kwa njia ya simu na mtandao wa MATUKIO DUNIANI  kutoka mkoani Kagera, Afisa habari wa Ruvu Shooting Masau Bwire amesema hali ya hewa ya kaitaba mchana huu ni nzuri na wanamuomba mungu mvua isinyeshe kwani uwanja huo una mashimo ambayo yanatuamisha maji.

“Kwa kweli uwanja wa kaitaba una mashimo na kama mvua itanyesha leo hii kabla ya mechi hakika mambo yatakuwa mabaya”. Alisema Masau.

Akizungumzia hali ya kikosi chao, Masau alisistiza kuwa mwalimu wa timu hiyo Charles Boniface Mkwasa “Master” amewapanga vijana wake kupata ushindi mbele ya Kagera na mpaka sasa hakuna majeruhi hata mmoja.

Kwa upande wa Kocha wa Kagera sugar, Abdallah Kibadeni “King Mputa” alisema maandalizi yamekamilika na wamejiandaa kupata ushindi mbele ya Shooting huku wakiwa na machungu ya kupoteza mchezo uliopita kwa kufungwa bao 1-0 na Polisi Morogoro.

“Tunamshukuru Mungu Kagera kwema na hali ya hewa nzuri, leo hii tumejiandaa kushinda na si vinginevyo, nawaomba mashabiki wajitokeze kutupa sapoti kubwa”. Alisema King Mputa.

 Ingawa timu zote mbili hazipambani kutafuta ubingwa ambao tayari umetwaliwa na Yanga wala kukwepa kushuka daraja, mechi hiyo bado ni muhimu kwao katika mazingira matatu tofauti.

 Kagera Sugar inayonolewa ikiwa na pointi 40 yenyewe inasaka moja kati ya nafasi nne za juu ambazo zina zawadi kutoka mdhamini wa ligi, lakini pia timu zinazoshika nafasi hizo za juu zinapata tiketi ya kucheza michuano ya BancABC Super 8.

Kwa upande wa Ruvu Shooting ya Kocha Charles Boniface Mkwasa yenye pointi 31 inasaka moja ya nafasi sita za juu ambazo ni fursa ya kuingia kwenye Bodi ya Ligi Kuu Tanzania (TPL Board) ambayo inatarajiwa kuundwa baada ya uchaguzi unaotarajiwa kufanyika Septemba 28 mwaka huu.

 Wagombea nafasi za uenyekiti na makamu wake ni lazima watoke katika timu zilizoshika nafasi sita za juu katika VPL msimu uliopita.

 Uchaguzi wa TPL Board utafanyika siku moja kabla ya ule wa TFF uliopangwa kufanyika Septemba 29 mwaka huu.