MBEYA CITY YASAKA VIPAJI VIPYA, MEI 18 WACHEZAJI WAPYA KUKIPIGA NA KAGERA SUGAR WILAYANI KYELA!!

Na Baraka Mpenja

Baada ya kukata tiketi ya kucheza michuano ya ligi kuu soka Tanzania bara msimu wa 2013/2014, klabu ya Mbeya City chini ya kocha mwenye historia kubwa ya kufundisha klabu ya Tanzania Prisons na timu ya mkoa wa Mbeya “Mapinduzi Stars” kwa mafanikio makubwa Juma Mwambusi akisaidiwa na kocha msaidizi Maka Mwalwisi imeanza mpango maalumu wa kusaka wachezaji wapya kwa ajili ya mitanange ya ligi kuu msimu ujao.

Kocha msaidizi wa klabu hiyo ambaye pia ni mkurugenzi wa kituo cha kuibua, kulea na kukuza vipaji cha  “Forest Youth Soccer Academy” (FOYSA) cha jijini Mbeya, Maka Mwalwisi “Mnyambala wa kweli” ameimbia MATUKIO DUNIANI kuwa kuna wachezaji waliochaguliwa katika zoezi hilo la kutafuta wachezaji wa kujiunga na Mbeya City msimu ujao wa ligi kuu.

Mwalwisi alisema wachezaji hao wanatarajia kucheza na timu ya ligi kuu,”Wanankulukumbi” Kagera Sugar siku ya jumapili (mei 19) wilayani Kyela.

“Baada ya Kagera Sugar kucheza na Prisons mei 18 mwaka huu uwanja wa Sokoine, tumewaomba kucheza dhidi ya kikosi chetu ambacho tumekiandaa ili kutafuta wachezaji wapya, mechi hiyo itatusaidia kujua wachezaji gani wanatufaa ili tuwasajili”. Alisema Mwalwisi.

Mdau huyo mkubwa wa soka la vijana aliongeza kuwa katika kikosi hicho wachezaji wengi ni vijana na wapo katika umri sahihi wa kucheza mpira ikizingatiwa kuwa soka la kisasa linahitaji makinda wengi zaidi kuliko wakongwe “Mafaza”.

“Kagera sugar ni timu nzuri na ina mwalimu mzuri, vijana wetu watapata funzo kubwa kutoka kwao, sisi benchi la ufundi la Mbeya City tunaamini kuwa itakuwa nafasi barabara kwetu kuwatazama vijana wetu”. Alisema Mwalwisi.

Mbeya City imekata tiketi ya kucheza ligi kuu msimu ujao baada ya kufanya vizuri zaidi katika michuano ya ligi  daraja la kwanza msimu wa mwaka huu.

Mbali na kukata tiketi mwaka huu, msimu uliopita pia walibakia kidogo kufuzu lakini bahati ikaangukia kwa upande wa mahasimu wao wajela jela Tanzania Prisons.

Sasa kutakuwepo na “Mbeya Derby” baada ya Prisons kubakia ligi kuu, huku Mbeya City nao wakiwa tayari wameshatinga michuano hiyo.

Kagera Sugar wanatarajiwa kuwasili kesho jijini Mbeya kujindaa na mchezo wa jumapili dhidi ya maafande wa Tanzania Prisons mei 18 mwaka huu katika uwanja wa Sokoine.