MATAJIRI WA “ICE CREAM” SASA MAKAMU BINGWA, KOMBE LA SHIRIKISHO BARANI AFRIKA MWAKANI KAMA KAWAIDA!!

Na Baraka Mpenja

Mwaka huu imeishia raundi ya tatu ya michuano ya kombe la shirikisho barani Afrika.

Ilianza kwa kuwafunga Al Nasri Juba ya Sudani kusini mabao 3-1 uwanja wa taifa, ikamalizia kazi Sudan kwa kushusha dhahama ya mabao 5-0. Ikaelekea Liberia na kukutana na Barrack YC ya huko, wakaindatika 2-1 nyumbani kwao na waliberia walipotia maguu yao Dar es salaam wakajikakamua na kulazimisha suluhu ya bila kufungana.

Safari yao ikaendelea kwa kukutana na AS FAR Rabat ya Morroco uwanja wa taifa,  mchezo wa kwanza walilazimishwa suluhu pacha ya bila kufungana, baadaye wakakwea pipa na kuelekea Morroco ambapo wakafungwa 2-1 huku Bocco akikosa mkwaju wa penati dakika ya 83 na kama angetia kambani wangesonga mbele hatua ya makundi.

Baada ya hapo Azam fc wana lambalamba walirejea nyumbani na Kuahidi kutafuta tena nafasi ya kucheza michuano hiyo mwakani ambapo tiketi pekee ni kushika nafasi ya pili katika msimamo wa ligi kuu soka Tanzania bara.

Leo hii katika uwanja wao wa nyumbani Chamazi, Azam fc wameshuka dimbani kuvaana na maafande wa Mgambo Shooting kutoka mkoani Tanga “Waja leo waondoka leo” huku wakihitaji sare ama suluhu ili kupata pointi moja na kujihakikishia nafasi ya pili msimu huu.

Hatimaye dakika tisini zilimalizika kwa wachezaji John Bocco “Adebayor” aliyejuta na kuwaomba radhi watanzania kwa kukosa penati muhimu nchini Morroco, Kipre Herman Tchetche pamoja na Attudo kufunga bao moja moja na kurudisha furaha kubwa kwa mashabiki, viongozi na benchi la ufundi la klabu hiyo chini ya kocha Muingereza Sterwat John Hall.

Sasa Azam wametetea nafasi yao ya umakamu bingwa baada ya kufikisha pointi 51 na kuwachinjilia mbali wekundu wa Msimbazi Simba waliokuwa wanawania nafasi hiyo.

Akizungumza na MATUKIO DUNIANI dakika chache baada ya kipute hicho kumalizika katika dimba la Chamazi, Afisa habari wa klabu ya Azam fc Jafar Idd Maganga amesema ushindi wa leo umetokana na mipango waliyojiwekea tangu wapoteze mchezo nchini Morroco.

Jafar alisema baada ya kutolewa na FAR Rabat walisikitika sana na wakajipanga kurejea tena katika mashindano hayo mwakani na mipango yao ilikuwa kushidna mchezo wa leo ili kuitwaa nafasi ya pili na kuiwakilisha nchi kwa mara nyingine michuano ya kimataifa na hatimaye wameweza leo hii.

“Azam imedhihirisha kuwa ni timu nzuri na inacheza soka safi, tutaendelea kuwapa burudani mashabiki wetu na sasa tunajipanga zaidi kufanya vizuri michuano ya kimataifa zaidi ya mwaka huu”. Alisema Jafar.

Jafar aliongeza kuwa baada ya ushindi wa leo wataendelea kukaa kambini kujiandaa na mchezo wa mwisho dhidi ya maafande wa JKT Oljoro katika dimba la Shekh Amri Kaluta Abeid jijini Arusha.

Azam fc msimu wa mwaka jana walikuwa katika kinyang`anyiro cha kuwania ubingwa na Simba, mwaka huu Simba kajitoa na kuwaacha wana lambalamba hao kubaki na wanajangwani katika mbio za kuwania ubingwa, lakini mbio hizo zimeishia ukingoni kwa Yanga kutwaa taji msimu huu na kupata nafasi ya kucheza ligi ya mabingwa barani Afrika mwakani.