MAJI MAJI FC “WANALIZOMBE” KUCHAGUA VIONGOZI WAPYA MEI 31 UKUMBI WA SONGEA CLUB!!

Na Baraka Mpenja

Uchaguzi wa viongozi wa klabu ya Maji Maji ya Songea mkoani Ruvuma “Wanalizombe” umesogezwa mbele hadi mei 31 mwaka huu ili kuwapa nafasi wadau wengi kujitokeza kuomba nafasi saba zitakazowaniwa katika kinyang`anyiro hicho.

Awali mchakato wa uchaguzi huo ulitakiwa kufanyika kati ya mei 15-20 mwaka huu lakini sasa utafanyika rasmi tarehe tajwa hapo juu.

Meneja wa klabu hiyo Godfrey Ambrose Mvula maarufu kwa jina la Makete ameimbia MATUKIO DUNIANI  kuwa wanawaomba radhi wadau kwa kusogeza mbele uchaguzi huo lakini kila kitu kipo sawa na wajiandae kwa tarehe mpya iliyotangazwa.

“Watu walishajua tarehe mapema, tumeamua kusogeza mbele kwa maslahi ya timu, tunaamini muda tulioongeza utatumiwa vizuri na wanachama wetu kuomba nafasi zilizotangazwa”. Alisema Mvula.

Mvula alizitaja nafasi zitakazowaniwa kuwa ni mwenyekiti na makamu wake, pamoja na wajumbe watano wa bodi.

Meneja huyo alisisitiza kuwa kwa wale wote wenye nia ya kuwarejesha wanalizombe soka la ushindani ni nafasi kwao kujitokeza ili kufanikisha azima yao.

“Zamani ukisikia Maji Maji unasisimka nywele, sasa wakati wa kurudisha ngoma ya Lizombe umefika na lazima turudi ligi kuu msimu wa 2014/2015”. Alisema Mvula.

Mvula aliongeza kuwa baada ya kufanyika uchaguzi huo, viongozi wapya kwa kushirikiana na wanachama na wadau wa soka mkoani Ruvuma wataandaa tamasha la “Maji Maji Day” ili kuichangia timu hiyo na kubadilishana mawazo jinsi ya kuirudisha timu hiyo ligi kuu.

“Tutakuwa na tamasha kubwa sana, tutawaalika wachezaji wa zamani wa klabu yetu pamoja na wasanii wa muziki wenye asili ya mkoa wa Ruvuma akiwemo Joseph Haule “Profesa J” mzee wa Mitulinga.