KUMEKUCHA CHANETA, KIBIRA AJA NA MIKAKATI MIZITO KUSUKUMA GURUDUMU LA NETIBOLI!!

Na Baraka Mpenja

Mwenyekiti mpya wa chama cha Netiboli Tanzania (CHANETA) Anna Kibira amesema, uongozi mpya wa chama hicho unarajia kuhamasisha mchezo huo uchezwe kila kona ya mipaka ya Tanzania na watu waliopewa vipaji na mungu walitumikie taifa kwa dhati yao.

Kibira ameiambia MICHEZO! kutokea jijini Mbeya kuwa mipango yao ni kupata vijana wengi wenye vipaji maeneo mbalimbali ya taifa hili lilijaa vipaji katika michezo na kuunda timu tatu za taifa.

“Tunataka netiboli iwe mchezo mashuhuri zaidi, vijana wote wa Tanzania wapate nafasi ya kucheza, tukifanya hivyo tutakuwa na timu nzuri za taifa na sasa tunataka kuwa na timu tatu, yaani ya vijana wadogo, wakati na watu wazima”. Alisema Kibira.

Mwenyekiti huyo alisema mpaka sasa hawajakabidhiwa rasmi ofisi, lakini wiki mbili zijazo watakabidhiwa na baada ya hapo watakaa kikao cha kwanza ili kupanga mikakati yao na kuangalia kalenda yao imekaaje.

Kibira aliongeza kuwa watanzani wawe na imani na uongozi mpya kwani wanajipanga kuendeleza mambo mazuri ya uongozi uliopita chini ya mwenyekiti wake Anna Bayi.

“Nafikiri tunayo kazi ya kufanya mengi zaidi ya uongozi uliopita, tunakuja na sera mpya ya kuufanya mchezo wa Netiboli Tanzania uwe wa kuvutia zaidi na kupeperusha bendera ya taifa kimataifa”. Alisisitiza Kibira.

Akizungumzia hali ya wadau kuwa nyuma kuthamini mchezo wa Netiboli, Kibira alisema lazima watanzania wakumbuke kuwa mchezo huo umelipa taifa sifa kubwa hasa baada ya timu ya taifa “Taifa Queens” Kufanya vizuri medani ya kimataifa.

“Imefika wakati wa kutukumbuka CHANETA, tuna mikakati mizito sana na tunahitaji uwezeshaji mkubwa sana, tunawaomba watanzania kutuunga mkono sana kwa kutuchangia na kuwekekeza katika mchezo huu”. Alisema Kibira aliyeshinda uchaguzi wa CHANETA aprili 20 mwaka huu.

Michezo sio soka tu, makampuni yanayojitokeza kudhamini mchezo wa soka yakumbuke pia kujiingiza katika mchezo wa Netiboli kwani unaweza kulitangaza vizuri taifa medani ya kimataifa.