KOCHA KUTOKA MGANDA ARITHI MIKOBA YA KIBADENI, KAGERA SUGAR WALIJUA LEJENDARI KIBADENI ANATIMKA!!

Kocha mpya wa Simba Ljendari Abdallah Kibadeni “Mfalme Mputa” ambaye amerithi mikoba ya kocha Mfaransa kibabu, Patrick Liewig 

Liewig hana lake tena Msimbazi, Kibadeni achukua mizigo yake

Na Baraka Mpenja 

Siku moja baada ya kocha wa wakata miwa wa Kaitaba, “Wanankulukumbi” klabu ya Kagera Sugar, Alhaj Abdallah Athumani Seif ‘King Kibaden’ au Chifu Mputa kuteuliwa kuwa kocha wa Simba hapo jana na leo hii kuanza kazi ya kuifundisha klabu hiyo kwa kusaili wachezaji wa kuwasajili katika uwanja wa Kinesi jijini Dar es salaam, Dar es salaam, klabu ya Kagera Sugar imetangaza kumpata kocha mpya kutoka nchini Uganda.

Meneja wa kagera Sugar Hussein Mohamed ameiambia MATUKIO DUNIANI kuwa walijua siku nyingi kuwa kocha wao Kibadeni alikuwa na mapenzi makubwa sana kwa Simba na ndio maana walijiandaa mapema kutafuta kocha mwingine.

Mohamed amemtaja kocha huyo kuwa ni yule aliyekuwa kocha msaidizi wa timu ya taifa ya Uganda wakati wa enzi za kocha Bob Wiliamson aliyewapa ubingwa “The Cranes” mwaka jana, na anaitwa Mayanje Jackson.

“Mayanje amewahi kuifundisha klabu yetu, aliondoka baada ya kuteuliwa kuwa kocha msaidizi wa  timu ya taifa, sasa anarejea tena na kila kitu kipo sawa”. Alisema Mohamed.

Mohamed alisisitiza kuwa Kibadeni alikuwa na mkataba wa mwaka mmoja na amemaliza muda ake na Mayanje anajiandaa kusaini mkataba wa mwaka mmoja  siku za hivi karibuni.

Akizungumzia suala la kuondoka kwa Kibadeni na athari zake kwa timu, Mohamed alikiri kuwa Kibadeni ni kocha mzuri,  ameacha pengo kubwa kutokana na uwezo wake, lakini hawana uwezo kutokana na lejendari huyo kuwa na mapenzi makubwa na Simba.

“Kibadeni anaipenda Simba sana, aliichezea na kuifanyia makubwa, hakika katuacha wakati tunamhitaji sana, tunamtakia kila la heri katika kazi yake mpya”. Alisema Mohamed.

Pia meneja huyo alisisitiza kuwa wanapanga mikakati ya usajili ili kupata wachezaji wazuri wa kupambana na Kibadeni akiwa na Simba.

Katika benchi la Ufundi la Simba, Kibadeni atakuwa anasaidiwa na walimu wawili, Mganda Moses Basena na mzalendo Jamhuri Kihwelo ‘Julio’, wakati Meneja atakuwa Nico Njohole na mtunza vifaa atakuwa Ally Cheche.

Mtihani wa kwanza wa Kibadeni unatarajiwa kuwa nchini Sudan mwishoni mwa mwezi ujao, ambako Simba itacheza Klabu Bingwa Afrika Mashariki na Kati, Kombe la Kagame pamoja na wapinzani wao wa jadi, Yanga SC.

Simba SC imepangwa Kundi A katika michuano hiyo pamoja na wenyeji El-Mereikh, Elman  ya Somalia na APR ya Rwanda, wakati Yanga ambao ni mabingwa watetezi, wamepangwa Kundi C na Ports ya Djibouti, Express ya Uganda na  Vital ‘O’  ya Burundi, wakati wapinzani wao wa jadi, Simba SC wamepangwa kundi A pamoja na wenyeji El-Mereikh, Elman  ya Somalia na APR ya Rwanda.

Katika michuano hiyo inayotarajiwa kuanza Juni 18 hadi Julai 2, mwaka huu mjini Khartoum, Sudan, mabingwa wa Kenya, Tusker wamepangwa Kundi B pamoja na wenyeji wengine, Al-Hilal, Falcons ya Zanzibar, Al Ahly Shandy ya Sudan na Al-Nasir Juba ya Sudan Kusini.

Simba SC itashuka dimbani Juni 21 kufungua dimba na El-Mereikh, wakati mabingwa watetezi, Yanga wataanza kampeni zao za kutetea taji Juni 20 kwa kumenyana na Express na mechi zote zitachezwa Elfashar.