KITAELEWEKA TAIFA LEO, MNYAMA USO KWA USO NA WANAJESHI WA RUVU SHOOTING!!

Na Baraka Mpenja wa

Wekundu wa Msimbazi Simba “Taifa kubwa” chini ya kocha mkuu Mfaransa Patrick Liewig leo hii majira ya saa 10 jioni watakuwa na kibarua kizito mbele ya wanajeshi wa Charles Boniface Mkwasa “Master”, klabu ya Ruvu Shooting katika uwanja wa Taifa ndani ya jiji la “Maji Chumvi”, Dar es salaam.

Kuelekea katika kipute hicho timu zote zimetamba kuibuka na ushindi, huku tambo za mashabiki zikiendelea kila kona ya jiji.

Kocha msaidizi wa Simba, Jamhuri Kiwhelu “Julio Alberto” ameimbia MATUKIO DUNIANI kuwa maandalizi ya mechi yamekamilika na kikosi chao kipo salama chini.

Julio alisema kikosi cha Mnyama ambacho kimesheheni makinda wengi kitacheza soka la kitabuni na kuwafurahisha mashabiki wao watakaofurika uwanja wa taifa.

“Sisi tunajenga kikosi na tunajua kwamba muda unahitajika, tunamshukuru Mungu kwa kutupa uzima na kesho tutacheza kutafuta ushindi mnono mbele ya Shooting ambao ni timu nzuri”.

Julio aliongeza kuwa siku zote ukitaka kuona raha ya soka ukutane na Ruvu Shooting ya Mkwasa kwani wanacheza soka safi na hapo kesho watakutana wataalamu wa soka na kutoa burudani maridhawa.

Wakati Julio akitamba kuwafunga Shooting, maafande hao kupitia kwa afisa habari wake Masau Bwire wamesema kuwa kauli ya Simba kuwa wanataka kulinda heshima yao kesho itagonga mwamba kwani watachinjwa tu.

Masau alisisitiza kuwa wamejiandaa kwa uzuri sana na wanajua Simba wana machungu ya kupoteza ubingwa na kuelekea kukosa nafasi ya pili, lakini wamejipanga kupambana nao kupunguza machungu ya kushindwa kuwafunga Oljoro mchezo wa nyumbani wiki iliyopita.

“Simba sio timu ya kutubabaisha, wanajua soka la Ruvu shooting, mashabiki wasikose taifa kesho, hakika kutakuwa na burudani kubwa sana, tuko fiti sana kupambana na mnyama”. Alitamba Masau.

Simba wanaingia katika mchezo wa leo wakiwa nafasi ya nne ya msimamo wakijikusanyia pointi 39 na Ruvu Shooting wanaofundishwa na Charles Boniface Mkwasa wapo nafasi ya saba wakiwa na pointi 31 kibindoni.