KAULI YA SISHUKI DARAJA WALA SIHITAJI UBINGWA INAUA SOKA LA TANZANIA!!

Na Baraka Mpenja

Tabia ya timu za ligi kuu soka Tanzania bara kupuuza mazoezi ya maandalizi ya mechi zao za mwisho kwa madai kuwa hazishuki daraja wala hazihitaji ubingwa inaua ushindani wa ligi na kushusha kiwango cha timu hizo.

Akihojiana na mtandao wa MATUKIO DUNIANI, katibu mkuu wa zamani wa shirikisho la soka Tanzania TFF, Fredrick Mwakalebela amesema kuwa timu za ligi kuu zinatakiwa kuachana na kusumba hii ambayo ni sumu mbaya kwa soka letu.

“Ukiangalia ligi za wenzetu ligi inajigawa kama Tanzania, kuna timu zinahitaji ubingwa, nyingine zinahitaji nafasi za juu, wakati kundi la mwisho wanahitaji kukwepa mkasi wa kushuka daraja, lakini ukiangalia mechi zinazowakutanisha wasioshuka daraja wala hawahitaji ubingwa na wale wanaohitaji ubingwa au wanashuka daraja, ushindani uko pale pale”. Alisema Mwakalebela.

Mwakalebela alisema kujenga historia ya timu kufanya vizuri katika michezo yote ni muhimu sana na timu za Tanzania zinatakiwa kuwa na malengo ya kujenga jina na kuwajenga wachezaji wao kushindana katika mechi zote ili wapate nafasi ya kuonwa na walimu wa timu za taifa pamoja na timu za nje ya Tanzania.

“Mchezaji anatakiwa kucheza katika kiwango chake cha siku zote bila kujali anacheza mechi gani, kama watazembea kwa madai kuwa hawashuki daraja wala kupata ubingwa, hakika ni ufinyu wa mawazo”. Alisema Mwakalebela.

Pia katibu huyo wa zamani wa TFF aliongeza kuwa viongozi wa timu za Tanzania wanatakiwa kujua kuwa timu inahitaji maandalizi ya muda mrefu na kushindana katika michezo yote, hivyo waache tabia ya kuwapumzisha wachezaji kwa muda mrefu kwa madai kuwa hata wakifungwa hawaathiriwi na matokeo hayo.

Siku chache zilizopita mtandao wa FULLSHANGWE ulihojiana na baadhi ya makocha wa timu za ligi kuu kuhusiana na maandalizi yao ya michezo ya kufunga pazia la ligi kuu mei 18 mwaka huu na walieleza kuwa kwa muda mrefu hawapo kambini kwa sababu mechi ziko mbali na kizuri hawataki ubingwa wala hawashuki daraja.

Historia ya klabu ni kitu cha msingi, ni muhimu kwa timu kujiandaa katika mechi zote.