KATIBU MKUU WA CHADEMA DR. SLAA ZIARANI MANYARA

 Na Happiness Mnale

KATIBU Mkuu wa Chama cha Demokrasia na Maendeleo (CHADEMA), Dk. Willibrod Slaa, leo anatarajiwa kuanza ziara ya siku tisa ya ujenzi na kukagua uhai wa chama hicho katika maeneo mbalimbali ya wilaya za Mkoa wa Manyara.

Dk. Slaa ataambatana na watendaji wa makao makuu ya chama sambamba na wabunge wote wa CHADEMA Mkoa wa Manyara.

Taarifa kwa vyombo vya habari iliyotolewa jana na Ofisa Habari wa CHADEMA, Tumaini Makene, ilieleza katika ziara hiyo, mbali ya kupokea taarifa na kukagua uhai na ujenzi wa chama hicho, Dk. Slaa pia atafanya mikutano ya hadhara miwili pamoja na mikutano ya kikazi ya ndani, ambapo atakutana na wanachama na viongozi wa maeneo husika.

Makene alieleza kuwa siku ya leo, Dk. Slaa atafanya mkutano Babati mjini katika viwanja vya Kwaraa na atapokea salamu za wananchi wa eneo la Mnjingu.

Makene pia alieleza kesho Dk. Slaa ataelekea Hanang, ambapo atapita na kuwasalimia wananchi wa vijiji vya Masqaloda, Measkron, Nangwa na Dirma, kabla ya kufanya mikutano ya hadhara Balangida na Gendabi mjini Hanang.

Pia alieleza Mei 20 na 21 Dk. Slaa atafanya mikutano ya hadhara Basutu na Haydom iliyopo Mbulu, na mkutano mwingine atafanya Dongobesh na Mbulu mjini.

“Mei 22, 2013 akiwa njiani kuelekea Babati Vijijini, Katibu Mkuu atawasalimia wananchi wa vijiji vya Mutuka na Mwikansi kabla ya kufanya mkutano wa hadhara Galapo, Babati Vijijini, kuanzia saa 8 mchana na Mei 23, 2013 atakuwa na mikutano ya hadhara maeneo ya Riroda, Dareda na Bashnet, Babati Vijijini,” alieleza Makene.

Aidhamwaka huu Dk. Slaa atakuwa Simanjiro na atafanya mikutano ya hadhara katika maeneo ya Msitu wa Tembo, Ngorika, Ngage, Orkesimet, Namaruru kisha atamalizia na Mererani.

IMECHOTWA GAZETI LA TANZANIA DAIMA LEO